Moena ge dasc luster a si autores

L’aministrazion de Comun de Moena, en colaborazion col Grop Ladin del paisc, porta inant la tradizion de ge dedicar l domesdì de sagra a la cultura.

Do marena la gejia de Sèn Vile se à avert a n bel grop de jent, da chiò e foravia, che à podù cognoscer l valor artistich da le parole de Annalisa Zorzi. Dapò l program é jit inant te la sala grana de le Scole dedicada al maester Simonin Maza per valorisar le produzion artistiche e leterare moenate.

L an passà l era stat temp de recordanze, col Canori, l Zerilo Bora e l Tinoto Monech, autores de gran nonzech se n jic oramai da dejenees. Chest an enveze l onor ge é stat dat a trei sentadins vives, che enceben enciasé fora de Moena i ge à fat onor a sia tera: de duc trei l é stat portà dant neve produzion.

La scontrada se à avert con n bel video, nasciù da n scrit de la Veronica Zanoner del Gabana enciasada jun Busan, che l’à la bela età de 99 egn. De chest rejonon chiò apede.

N retrat con chi che à scrit, endrezà e prejentà: Angela Chiocchetti, Paolo Bernard, Amedeo Valentini del CGF, Armando Vadagnini, Annalisa Zorzi, Giorgio Jellici, Marcelin Chiocchetti, Fabio Chiocchetti e Cristina Donei.

Dapò la vizeombolta Cristina Donei e la presidenta del Grop Ladin Angela Chiocchetti à portà l salut e prejentà Giorgio Jellici del Garber. Professor e om de cultura da egn enciasà a la foresta, Giorgio Jellici no se à mai desmentià de Moena e sun sia storia l à scrit trop. Chest’outa l ge à sport a sia jent na contia dal titol ‘Storia de n retrat’, vegnuda fora per moenat e talian desche numer spezial de Nosha Jent. Jellici à rengrazià l Grop Ladin, e en particolar Fabio del Goti per aer rencurà »con competenza e intransigenza« la edizion e Marcelin del Cenchen per aer fat na traduzion »no leterala na leterara, più bela che per talian«. Apontin Marcelin à dapò rejonà del liber, che el à traslatà con gran piajer ajache l recorda persone che l à cognosciù (l Carlo Garber e la maestra Valeria) contan la storia curiousa del retrat del Tinoto Garber e de soe doi femene; na storia de noscia jent, scrita a na vida lijiera ma che rejona ence de momenc de dolor e la fasc capir l raport anter generazion e l’emportanza de vardar, scutar e tegnir cont di valores de nesc veies.

Dapò l é stat Annalisa Zorzi a compagnar Armando Vadagnini te la prejentazion de sie nef liber, n roman che rejona de amor e che à per titol ‘Quando l’amore è rivelazione’. Ela à rejonà de la familia de chest professor, giornalist e scritor storich enciasà a Trent, na familia con na longia tradizion de musega e cultura - l’à dit recordan l maester Crestan da Sort - e el à contà coche la é stata che tel temp de la clausura sanitara, a no poder jir te biblioteca per si studies l à tacà a scriver chest roman: beleche 300 piate che conta de n amor delicat é vegnude fora zenza fadia te doi meisc e mez. N roman che à ite desvalives referimenc storics e politics e che rejona ence de Moena, enceben che l paisc no vegne mai nominà per ge dar n carater più universal al contegnù.

L domesdì cultural é stat viventà da Paolo Bernard e Angela Chiocchetti, che con piano e ousc à sport sonade classiche e ciantie del Canori che à soscedà de gregn batiman da duta la jent te sala.

Lucia Gross