L restaure del relief

L dì de Sèn Vile, ai 26 de jugn de chest an l é stat inaugurà i laores de restaure del basrelief de la Madona col Bambinol anter doi angioi, che ai primes de jugn l’aeva podù vegnir metù a so post sora l usc de la calonia de Moena.

L relief sora usc da calonia de Moena restaurà.

L é n ben vincolà da la Soraintendenza de Trent per so valor artistich, l era malmetù e l aea besogn de vegnir restaurà. L é na opera del 1949 realisada dai studenc de la Scola d’Art del Zerilo Bora.

La Maria Lorenz, arlieva del Zerilo la se recorda che la fegura de la Madona la era stata fata dal Batistin Defrancesco Gianot e i doi angioi da la Edda Ferrari e da la Flora Dellantonio, dut sote la direzion del maester Zerilo Bora.

En ocajion de la publicazion del liber “Cirillo Dellantonio Bora e la scuola d’arte di Moena – Documenti e testimonianze” dat fora da l’Union di Ladins-Grop Ladin de Moena e dal Comun de Moena, se aon empensà che l vadagn che vegnia int da chest liber aesse cognù jir per l restaure de chela opera.

Se à ciapà n contribut del 50% da la Soraintendenza de Trent tras l enteressament del funzionarie Giovanni Dellantonio, l rest i lo à metù la parochia. L’Union di Ladins a contribuì con 1.657 euro.

L restaure del basorelief e del usc de la calonia e del cuertöl soravia coi simboi dei 4 evangelisć l à costà più che 10.000 euro e l é stat realisà da Stefano Gentili, n restaurador spezializà tel restaure de opere de legn e acredità da la Soraintendenza.

Annalisa, Nosha Jent nr. 3 del 2022