Festa del Rengraziament al Socors da mont
L’Union di Ladins de Fascia endreza ence chest an la Festa del Rengraziament. Per la sociazion l é dassen n moment emportant: ogne an la tol dant na realtà desvaliva per ge dir develpai per chel che la fèsc per noscia comunanza. Del 2020 l é stat rengrazià sociazions e enc che se à dat ju per didèr fora la jent sot l temp del covid, alincontra l an passà l é stat rejonà de la Scola ladina e rengrazià i Sorastanc che à ret e rec chesta istituzion.
Chest an la se dejujarà a Ciampedel en domenia ai 23 de otober e vegnarà rengrazià i volontères del Socors da mont. Ciampedel l é l cher de la storia del alpinism te noscia Val, olache la pruma fegures de menacrepes é nasciudes. L Socors da mont se dèsc ju da egn per didèr fora chi che va sa mont e se troa en dificoltà, l laora sotousc, zenza lumes e sirenes, ma l é segur de gran emportanza te noscia val da mont.
La giornèda pontarà via dadoman con na curta procescion da piaz fin te gejia con la Musega de Poza. La Messa vegnarà zelebrèda da don Mario Bravin e ciantèda per ladin te gejia di Sènc Felip e Giacum. Do funzion la Musega de Poza portarà en defilèda la jent fin te tendon de Ischia, olache sarà n picol conzert, i descorsc ofizièi e de bon mezmesdì.
L Club Pietrone endreza la marena con de bona pria con bales e capusc, e apede n douc. La marena vegnarà sporta a duc i operadores de la trei stazions de Fascia del Socors da mont ma la é averta a duc su prenotazion dant da en lunesc ai 17 de otober, telefonan te senta al 0462 764545 ti oraries de ofize (opura scrivan ite na mail a union@ladinsdefascia.it).
Domesdì via, semper te tendon de Ischia, da mesa les trei domesdì sarà la mesa torona moderèda da Alison Prinoth olache, apede a raprejentanc del Socors de val sarà ence Maurizio Dellantonio, president del Socors nazionèl, e autra testimonianzes. Do chest moment de confront e testimonianzes, sarà l moment de rengraziament ofizièl a la trei Stazions te noscia Val.
Ve envion duc chenc a tor pèrt a chesta bela dì de festa!