‘L picol becalegn’ met al zenter i letores più picoi
La pissèda per n liber sensorial interladin per picoi bec la é peèda via da l’Uniun Ladins Val Badia. N lurier empegnatif con n percors ence belebon tribolà, ma che tinultima à garatà. ‘L picol becalegn’ l é l nef liber portà dant enstadì ence te noscia Val. Te na dejina de piates con de bie dessegnes a colores a èga fac da la gherdenera Johanna Kostner vegn contà la contia scempia de n picol becalegn.
L lurier che se scon tedò a n nef liber
Tedò a la contia, metuda ju da la fascèna Melissa Locatin, conseiera de l’Union de Fascia co-editora del liber, e Anna Laimer de Gherdena, se scon n lurier pedagogich e didatich. »Aon cernù n stel de schertura scempie con tante ripetizion che deida i bec a emparar le costruzion di pensieres. Aon cernù n ambient da chiò entorn, l bosch, e i fac conté te la contia é giusć a livel scientifich e se pel donca emparar zeche de real. I colores di dessegnes à tonalità belebon chiare che se lea a la natura e les deida a se relassar«.
L liber l é fornì con n modul sonor sostegnibol fat de legn, che a l bater l reprodusc l son del becalegn. »Per ciapar la zertificazion europeana, de obligh per i prodoc ouc a picioi, aon spetà dassen n muie de temp, l é stat n gran lurier burocratich vindedò e empegn economich. L modul ge dasc na part de manualità al liber, emportanta per i bec picoi«.
La pruma prejentazion del liber e olà l troèr
Ensema ai Servijes linguistics e culturèi del Comun general e la Biblioteches de Comun de Fascia l é stat endrezà trei prejentazion desvalives con atività da color per picioi. La pruma, e ve rejonon anché de chesta, é stata portèda dant en mercol ai 22 sa Vich.
La scontrèda, a numer serà, se à dejout al pian bas de la biblioteca. La se à avert co la letura del liber, apontin dalajà che la publicazion la é pissèda per esser ence leta adaut. Melissa la ge à let la contia al picol publich: con domanes ite per anter, la pausses de letura trefèdes e l son del becalegn che ressonèa te sala l é stat na gran maravea no sentir sgolèr nience na moscia.
A la fin del liber l’Union, vidèda da Melissa, à endrezà na atività da color. Compagné da sie genitores, i bec se à encolorì la man con colores forc e spifenc. Pojèda su n sfoi, l é temp de endrezèr la coa del becalegn con toc de sfoes da encolèr dut entornvia. L é stat fat l bech del becalegn con n deit da color e do tacà su i eies tremolanc de la bestiola. Vindedò n picol ciolet, e eco fat n picol chèder personalisà da se tachèr su a cèsa! I bec é stac protagonisć ‘con sia mans’ de la prejentazion.
Vedù l gran e bon ejit, l é en program na neva prejentazion tel chèder de l’Aisciuda Ladina. Endèna duc i enteressé pel troèr l liber da comprèr ite a Sèn Jan, te senta de la sociazion, visavì l Hotel Dolomiti.