I ‘fac’ de Ismaele Soraperra à empeà l debatit
»Vivon te na realtà caotica: sion sofoé ogne dì da massa informazions che ne rua da ogne man. L é doventà senester esser bogn de filtrèr autonomamenter chel che ne suzede dintornvia e se fèr n’opinion. Sion desorienté, no sion più patrogn de nosc pensier«. Chest l é un di gregn conzec vegnui fora da la pruma scontrèda de ‘fac’, stata en sabeda ai 25 de mèrz a la Mia Majon de Cianacei per endrez de l’Union di Ladins de Fascia. Enceben che la discuscion se abie envià via peigra, l confront anter Ismaele Soraperra, artist e ideator del projet artistich, e i enteressé che à tout pèrt a la prejentazion, presciapech na ventina de ogne età, l é stat a la fin dassen feruscol, con imput e idees desvalives.
Ismaele, che l à tanche serà su n percors de Erasmus a Anversa tel Belge e che l à vivù donca de picola cultures de na gran zità che se mesceda l’una con l’autra, à volù ge portèr dant chesta endesfida a la sociazion ladina, che la l’à touta su con gran enteres. »La proponeta la ne à sapù frescia e moderna. Ismaele l é n joen, e per nos l é emportant uzèr fora i talenc de noscia Val«, l é stat dit da man de la vizepresidenta Nicoletta Riz al scomenz de la scontrèda.
»Noscia Val l’à sia storia e cultura, la particolaritèdes de na picola comunanza, ma la é influenzèda da chel che suzede stroz per l mondo – à dit dantfora l autor. L penzin, l aument del cost de la vita, l é dut mudamenc che ne toca. L é na picola realtà la noscia, ma che vif la tematiches a livel global«.
La stampa
Te na stampa grafich-artistica, Ismaele à portà dant fegures iconografiches lurèdes fora digitalmenter. Tropa fegures śales su sfon fucsia che spieia l stil artistich de Soraperra e les porta a l’atenzion argomenc più gregn, più endestres. Les moscia a na vida zis contemportana la confujion de na realtà caotica, che soscedea impuc de reflescion dassen desferenc anter ic. L é la raprejentazion de nesc tempes. L test vindedò de compagnament scrit da Nicoletta Riz l é na ‘schertura scempia’, lineara e artistica che envia a la na reflescion.
L’èrt desche forminant del Pensier
La discuscion é peèda via dal entener l prodot artistich ‘fac’, entener la forma artistica che l é stat cernù per chest projet. Respet al Almanach, che vegnia fora l an do, ‘fac’ dèsc l met de descorer sul ‘pan fresch’, chel che l é giusta sozedù, enveze che jir drec desche na ferata. »L é senester entener na produzion de chesta sort, ajache la envia a n pensier critich personèl. L’èrt pel formèr n pensier critich, l giornalism enveze l enforma« - l é stat dit da più che na persona. ‘fac’ vel esser na endesfida per noscia jent, la sensibilisèr en cont ai fac. Perché pa no jir ence fora per noscia piazes e strèdes? Tachèr fora placac de la stampa che ferme la jent, acioche la se domane: ‘ma che él ‘sta roba?’. Dapò o la passa dret, opura fosc la se ferma n medeat per proèr a entener chel che se volea comunichèr. L’èrt dèsc l met de se fèr n pensier, ma ence la libertà de no se l fèr. »Te nesc tempes, n’èrt che no se enten sobito l é n zil arjont!«.
Anter informazion, capitalism e mudament
Tel debatit no l é mencià la critica al capitalism che ne à dat l met de viver con benesser. Sion pèrt de na gran cultura mondièla, e chest l é stat confermà dai joegn te sala: »Sion più leé a Eni, a n schiop, respet ai sènc. L é emportant l confront col mond, ajache Fascia da spes la creit de esser te na bola«. I valores de noscia tradizion che fonèa sia reijes te la spiritualità anchecondì i é mudé. »L’opinion de la jent la é scherpenta, la se lascia vidèr da una e da l’autra «. Ismaele en cont de chest l à portà dant dassen n bon pont de reflescion: »L é senester mudèr, ma dapodò: mudèr te che? Chi él che dezide che che l é giust e che che l é falà?«.
L é temp de rejonèr e tor ite la jent: ‘fac’ pel esser na ressorsa
Te la discuscion l é sutà fora ence proponetes de argomenc da tratèr ti neves apuntamenc de ‘fac’. »N projet che descor de chel che suzede l cogn tor dant l projet BRT che jirà a mudèr foja e vivibilità de noscia val. Chest projet de mobilità de Fascia e Fiem va inant e la jent é pech enteressèda. L BRT ge va do a la lege di numeres! Ma no n aone jà assà de ghesć? Aon besegn de calità, no de cantità«. L debatit a chest pont l se à empeà su: »che n peissei i joegn de chest projet?«. Ismaele: »No é amò abù ocajion de me fèr na idea chièra, ma sé demò che voi defener l ambient e la vivibilità de noscia val«.
Na proponeta utola e moderna
‘fac’ l é stat aprijià te chest prum apuntament. »Se troèr per rejonèr, coi ‘fac’ e se vardèr ti eies a se baratèr idees vegn fat dinrèr: te Fascia mencia momenc de condivijion. L’Union à desmostrà con chest nef projet de esser inant – l é stat dit. ‘fac’ pel dassen esser n vèrech per scassèr fora la jent«.
A la scontrèda l é stat dat fora na stampa firmèda e numerèda da man del artist. Les é en numer limità e chi che volessa i pel la domanèr te senta de l’Union di Ladins.
La pruma scontrèda del projet à troà te Mia Majon na senta adatèda e te Marti Cigolla na gran desponibilità. La seconda scontrèda de ‘fac’ é en program tel chèder de l’Aisciuda Ladina, ai prumes de mé e la vegnarà endrezèda te n auter paisc dalajà che l’idea sarà itineranta per tor ite più jent possibol. Estra che na stampa da tegnir su, l’outa che vegn vegnarà metù fora ence placac. No ve fajé pa sperder ju, ma fermave n medeat e proà a fèr mingol de fadia!