Soneste l orghen da mantesc o la reta?
La pruma edizion la era stata metuda a jir del 2015 tel chèder de l’Aisciuda Ladina ta Dèlba a La Cacciatora, e dapodò na seconda – vedù l bon ejit de la pruma – del 2017 al Hotel Rizzi de Pera. Ades, passé 6 egn, la sociazion, su spenta de sie president Fernando Brunel, enten meter a jir endodanef la gustegola scontrèda di orghegn da mantesc!
L envit é donca averta a duc i sonadores (e la sonadores) de Fascia e da foradecà che sona l orghen da mantesc, o ‘orghin’ per chi da la Val de sora.
No serf se enjignèr nesciugn toch dantfora, demò se portèr do l strument e la voa de sonèr, se baratèr sonèdes, emparèr zeche da nef dai etres e stèr en compagnia.
La legreza de sonèr l orghen da mantesc te n gustegol dessegn de Manuel Riz.
Envion donca duc chi che à gust de tor pèrt a ne fèr a saer se i é, al numer 0462 764545 (ence su WhatsApp). Speron che sarede de tropes con vosc orghen classich o diatonich, per fascian reta (Steirische), per sonèr de bie toc da stua da zacan o de la Volksmusik opura zeche de stil più modern … o ence demò proèr a emprovisèr vèlch toch ensema a oreia.
A la scontrèda tolarà pèrt ence n grop de joegn sonadores de la Scola de musega Il Pentagramma.
L apuntament l é per en sabeda ai 15 de oril da les trei domesdì lo dal Hotel Rizzi de la familia Salin de Pera. La scontrèda la é bensegur averta a duc chi che à gust de tor pèrt, per scutèr su de bela musega en compagnia con n bon marendel e perché pa no? Se fèr ence n bal. Ve speton de n muie per na bela festa en musega!