L nef numer de Nosha Jent

L’era l’an 1963 canche per endrez del Grop Ladin da Moena vegnìa dat fora l prum numer del boletin »Nosha Jent«. Da beleche 60 egn donca chest codejel dut per ladin vegn metù ensema, a trac con gaissa e te etres momenc con più fadia, beleche semper con 4 numeres a l’an, e l ge porta a zirca 300 sozi e aboné n muie de bela piates ladines, con neves, pensieres, riflescions, poejies, jeghes e auter.

L’ultim numer de Nosha Jent l’é vegnù fora de setember de chest an e l porta l ‘Diovelpaie’ a don Enrico Conci, che à lascià la parochia de Moena apontin de setember, mizacoles de storia sul desfrutament de la mont, riflescions sul bosch e sul ambient, scric veies e poejies de anchecondì, e amò contribuc da moenac a la foresta, paroles encrojèdes, l jech per endoinèr n lech, la azion de restaure de l’opera del Zerilo Bora, i augures a Don Bruno Daprà che l’à compì 80 egn (e che l’é ence n poet n muie produtif, e l Grop Ladin l’é tel lurier de meter ensema si scric per na neva publicazion) e trop de più.

A vardèr fora duc chisc numeres se pel descorir n gran melaur de storia, de paroles, de recorc, che fèsc più rica la cultura e l lengaz de noscia val e che pel esser amò anchecondì fontèna de informazions preziouses per chi che chier vèlch o fèsc enrescides.

La consaputa del valor de chest patrimonie ciapa maor forza ogne outa che l’empegn, dut de volontariat, per jir inant somea doventèr massa pesoch.