L destin del Grop Ladin e de ‘Nosha Jent’: l grop chier volontadives
»De chel grop de persone litade a rejer l Grop Ladin da Moena ja i egn, – à scrit la presidenta Angela Chiocchetti del Goti te na letra manèda fora a duc i sozi e aboné – aldidancö no resta che pöce persone che se à cruzià nfin ades a meter ensema l boletin, a publicar calche liber con l’aiut prezios de volontadives e calche autra scomenzadiva de carater cultural. Più oite aon palesà le dificoltà a jir inavant, la fadìa a troar l temp, la disponibilità e jent jovena motivada a se dar jù. Chesta Pandemia no à segur miorà la situazion...«
Ades l’é ence vegnù l moment de litèr de nef l diretif, che l’é jit fora da vèlch an e no l’é più stat renovà. Te chest passaje emportant l Grop, ensema con l’Union di Ladins de Fascia, à auzà fora i dubies e la conscidrazions che se se troa dedant vardan al davegnir e che cogn troèr na resposta chièra per poder jir inant con forza e gaissa neves.
Te sia letra la presidenta Angela Chiocchetti à metù dant chesta domanes: »Volone che l Grop Ladin da Moena, sezion locala del l’Union di Ladins de Fascia, el vae inavant? Volone che l boletin de NOSHA JENT el seghite a vegnir fora e ruar te nosce ciase?«
L’Union di Ladins de Fascia, che pel contèr su n ofize con personal paà olache l’é ence la redazion giornalistica de La Usc di Ladins, se à jà metù a la leta per dèr na man a livel organisatif, ma la spenta e la dizijions cogn vegnir da la comunanza. L’é besegn de gaissa, de idees, de jent che se mete a la leta con convinzion arseguran de seghitèr a didèr e manèr inant l Grop e sie boletin, che podessa vegnir slarià fora de più a duc i fascegn te val e a la foresta, sorafora la seides de Moena.
Per chest l envit vegn uzà fora a duta la jent che à mingol de bona volontà, da Moena ma no demò, a tor pèrt a la radunanza generèla di sozi che sarà en domenia ai 7 de november da mesa les cinch domesdì (16:30) te teater del Oratorie de Moena, e ence a dèr sia desponibilità chiaman o manan n sms al numer 340 2353361 o na mail a angela.chiocchetti@gmail.com. LG