Dò la pedies de Daniel Zen

Per cognoscer la storia de nesc aves ma ence per se troèr na dì en compagnia e legreza, l’Union di Ladins de Fascia endreza na raida a Persenon e Neustift, en sabeda ai 30 de otober del 2021. 

L’ocajion l’é chela de jir a veder i lesc olache l’à vivù Daniel Zen, nasciù a Vich del 1584, descheche scrif Pare Frumenzio tel liber »Daniel Zen, Vescof de Persenon« dat fora da l’Union di Ladins del 1984 desche estrat de Mondo Ladino. »Daniel Zen l0é mort la sera dai 24 de setember del 1628 – scrif semper P. Frumenzio – l’aea 43 egn, 10 meisc e 16 dis zirca. La sepoltura la é stata ai 27 de setember. La gran pera che seraa la fossa se la veit tel portegal del Dom de Persenon, enmurada tel parei. A la Cambra Aulica de Persenon l’à lascià 11.798 fiorins. La roba ritada da soa mare Orsola de Daniel, valutada 4.000 fiorins, beleche duta sul tegnir de la Regola de Vich, l ge l’à lasciada per mantegnir l Capitanio e l Giudize de Fasha. L’à volù lasciar fora demò n ciamp, nominà Ciamp pian, che dajea zirca 30 fiorins de utol, per ge l lasciar a la Premessaria de Sènt’Uliana. Te la seconda metà del 1700 l Dom de Persenon i l’à  refat descheche l é ades: ence le fosse di Vescoves con soe lapide le é state mudade de post. La lapida de Daniel Zen, con stema e iscrizion, i l’à tramudada tel clauster medemo del Dom, da la man da doman. Soravia se veit n’aucia zipiada tel sas e chesta iscrizion: ‘Qui custodit non dormit Danieli Zen Principi Vigilantissimo’«.

Mizacoles de storia che se podarà cognoscer miec te la raida de l’Union di Ladins, ajache se jirà belapontin a veder chisc lesc col compagnament e la spiegazions del president Fernando Brunel e del conseier Fabio Chiocchetti che à scrit »I Misteres del Cjaslir«, n roman storich ispirà da la vita de Daniel Zen.

L program perveit de se troèr da les 7:45 tel piaz gran tedant la Coprativa de Sèn Jan e pontèr via entorn les 8:00. Entorn les 10:00 se rua a Persenon olache se vijita l Dom e l closter ló apede, da les 10:30 vijita al Hofburg con la sala del Consei Aulich olache l é logà l stema de Fascia Eves, da les 11:30 raida fora per i portesc, se podarà veder la Cèsa del Giudize, l Salvan dai trei ceves e l veie Rathaus, marena a Persenon. Domesdì se jirà a Neustift olache da les 14:00 se jirà a veder l’Abazia e entorn les 16:30 se fenirà su con n bon Törggelen a Laion. Se ruarà te Fascia entorn les 21:00. MCI