Dò la pedies de Daniel Zen
Presciapech na trentina de persones, dai 8 ai 90 egn, à tout sù l’envit sport da l’Union di Ladins de Fascia de tor pèrt en sabeda ai 30 de otober a na dì de cultura e legreza tel Sudtirol, e più avisa a Persenon, senta del prinzipat vescovil che à tout ite ence Fascia enscin del 1818.
A les compagnèr, tel program endrezà da la vizepresidenta de l’Union Nicoletta Riz, l’era doi guides de ecezion: Fernando Brunel e Fabio Chiocchetti. L president de la sociazion e espert de raides e de dut l raion ladin e del Sudtirol, à scomenzà jà da doman su la coriera a moscèr e contèr la belezes di lesc che se vedea fora; a Persenon enveze capogrop l’é stat l conseier e jà diretor del Istitut Ladin, espert de storia e cultura e autor del liber »I misteri del Cjaslir. Storia di un santo vescovo e di una presunta strega« roman storich su Daniel Zen da Vich, stat Piscop de Persenon del 1627-1628.
Apontin su la pedies de Daniel Zen l’é peà via l percors de cognoscenza de la testimonianzes del strent leam anter Fascia e Persenon. Tel closter del dom, defat, se pel veder la plota sepolcrala de Daniel Zen, che é stata touta sù dal fon del dom e metuda sul parei, e ence l monument da mort del »principi vigilantissimo« con sie stem de l’oca e i simboi episcopai. Chiocchetti à contà mingol de la vita del soul Piscop ladin, di dubies per sia mort tant bonoriva a cajon de na malatia misteriousa, de sie ruol apontin te chi egn che n muie de femenes te Fascia vegnia cusèdes de strionaria, apontin duc i elemenc che i l’à spent a scriver l roman.
Tel closter del dom de Persenon se à podù mirèr amò i bie depens e ence l monument a Oswald von Wolkenstein, poet e ciantor, protagonist de lejendes desche chela de »Man de fier«, metudes en musega ence per fascian dai Marascogn.
L blason de Fascia
Dapò l grop é jit a veder l’Hofburg, l palaz vescovil olache prum de dut se à podù veder l blason de Fascia. La fegura storica del pèster del Herrschaft Eves, te sia umoltà che raprejenta n popul de jent scempia, fèsc sia bela parbuda anter duc i blasons noboi te la bela sala del Consei de Cort e la veder à soscedà emozion tel grop, endèna che la doi guides ladines recordèa che l fat de no aer abù noboi e ciastie no l’é n limit ma n valor per noscia val, che à coscì podù aer sia ledeza e autonomia.
Te la medema bela sala l’era fora i retrac ofiziai di Piscopes, fac te la medema foja de chel de Daniel Zen, che fazile aessa cognù esser te anter, enveze per vies no deldut segures l’é ruà te Fascia e, de gra a la azion de restaure fata proprio da l’Union di Ladins con i provenc del liber de Chiocchetti, ades l fèsc bela parbuda te la sales del Museo a Sèn Jan. Te la vedrines sot i retrac, enveze, l’é duc i boi per i sigii di piscopes, e anter chisc ence chel de nosc piscop fascian.
Sèntes, vergines e trinità
Anter duta la operes metudes fora tel medemo palaz vescovil, tel museo diozesan, l’atenzion é stata portèda da Chiocchetti sun desvalives chèdres che fegura sèntes vergines che se troa ence te noscia gejia, soraldut sa Sènt’Ugèna: Orsela, Caterina, Bèrbola e Margareta. Gran marevea à soscedà ence te la sala dedichèda a la religiosità populèra i depenc de la sèntes de Maranza, Aubet, Cubet e Guere e sentir sia storia contèda dal conseier fascian, e veder la fegura de S. Kümmernis, la sènta con la bèrba.
Chesta fegures, desche chela del Salvan con trei ceves che se pel veder sun n cianton tel zenter storich, apede ai picoi portesc, l’é segnes de na ritualità veiora, de na concezion del mond vidèda dai raporc con vivènes e salvans, che dapò la religion catolica à vardà de tor ite anter si ric coche l’à podù.
Neustift, n encant de natura, cultura, storia e èrt
Dò aer dat na veièda a la Cèsa del Giudize e al veie Rathaus, olache la stries vegnìa emprejonèdes, e aer marenà, l grop se à tramudà a Neustift.
Aló da la veia Abazia agostiniana, tegnuda desche n bombo, do l retrat de grop dedant a Ciastel Sènt Angel, se à podù veder l poz de la marevees, vijitèr la gejia, la cortina e l closter con depenc fosc amò più bie che chi de Persenon, che recorda trop chi de l’abside de la gejia de Sènt’Ugèna. Dapò i partezipanc à podù aprijièr ence la beliscima biblioteca con i volumes manoscric e minié e veder i bie depenc, en particolèr chi de Michael e Friedrich Pacher, desche l beliscim utèr da porteles dedicà a Sènta Catarina.
Ence chiò no l é mencià na marevea che ne à portà col cef te la gejia de Sènt’Ugèna: su na portela de utèr dedichèda a S. Agostin se veit defat l sènt endèna sia vijion de la Trinità, che la é fegurèda apontin desche chela tant rèra de nosc santuarie sun Ciaslir: con trei musc... desche l Salvan di portesc de Persenon!
La beliscima giornèda de cultura se à serà su en legreza con l Törggelen a Laion, e con la emprometuda da man de l’Union de meter a jir amò ocajions de chesta sort.
Lucia Gross
