I studenc su la pedies del Zerilo Bora
Desche te ogne edizion del Simposie, ence chest’outa na pèrt emportanta l é stat chela del laboratorie didatich, ocajion per i studenc del ultim an del Liceo artistich de Fascia de se sproèr a zipièr te piaz dedant a la jent e de se troèr visavì con artisć che à più esperienza per cognoscer ence aspec de l’èrt desferenc da chi che se pel emparèr te scola.
Studenc e ensegnanc del laboratorie didatich.
Vidé dai ensegnanc Davide Deflorian, Andrea Dorigatti e Tiziano Deflorian, 6 studenc se à empenentà te la realisazion de trei operes aldò de n projet dassen enteressant, che li à mené a jir do la pedies del maester de Toni Gross: Cirillo Dellantonio Bora, che a Moena l à avert la pruma Scola d’èrt per zipièr.
Tolan ispirazion da l’opera del Zerilo che é loghèda te cortina de Moena e che raprejenta l dolor, i studenc con si ensegnanc i à fat n percors per esprimer n sentiment travers n moviment del corp sot a n lenzel.
Eleonora Bombaci, Giorgia Dagostin, Nicolò Dorich, Marga Gadenz Novello, Elisa Lorenzoni e Rayssa Stambè à raprejentà la pascion, la tristeza e la ledeza, pean via da na bora de zirm, e enceben che l laboratorie sie jit do a na foja più vejna a la scultura classica respet ai strumenc realisé dai artisć del simposie, ence chesta pèrt à abù ampò l surplus de meter i studenc a confront con l’esprescion de sia emozions.
Lucia Gross, La Usc 37 del 2022
