Acherle? Bensegur per ladin!
Maia auta, maia bassa, cedenela: duta canta paroles che se à tras sentù endèna la 6 scontrèdes del cors de acherle endrezà da l’Union di Ladins de Fascia lo dal Agritur Soreie. No podea esser post più trefà per la doudesc femenes che à tout su l’endesfida de la sociazion: emparèr a fèr zeche da nef col acherle!
L livel anter la partezipantes l era desvalif: cheles che saea jà fèr se à confrontà con tecniches più endestres, enveze cheles che à tout te man l acherle per la pruma outa à podù emparèr i ponc più sorii. La maestres che à rencurà la scomenzadiva, Christine Fontana del Grop de volontères de Vich Millecentrini e la colaboradora de l’Union Cristina Marchetti é states dassen contentes de coche la é jita. L obietif de chest percors l era enjignèr doi presines coi colores ladins, realisèdes su n schem de maia auta e cedeneles e con ponc suté ite per anter. Se metea coscita ensema cater o cinch cadrac da recamèr, aldò de la mesura che se cernea, o se podea lurèr fora na presina fata con n pont più spes.
Anter na ciacola e l’autra, bensegur per ladin, se à creà n bel grop de lurier e dutes se à didà una con l’autra. Belimpont, e aon da l sotrissèr, veicolèr l lengaz a na vida desvaliva, più lejiera e sorida, l é stat l zil maor de la scomenzadiva.
L percors, a numer limità, l se à serà su angern con l’emprometuda de se troèr endodanef con na endesfida più senestra, magari con n cors per fèr n sarner a maia… ma chechemai sie, se spera de se troèr endodanef! Endèna n gran e fort develpai al Agritur Soreie e a la familia Ghetta per l’acolienza e desponibilità, a Christine e Cristina per la pazienza e duc i ensegnamenc e a dutes cheles che à tout pèrt con gran curiosità!