N 2021 rich de scomenzadives per l’Union di Ladins
L an 2021, enceben amò segnà da la pandemia, per l’Union di Ladins de Fascia l é stat rich de ativitèdes, projec e publicazions. Gran atenzion ence ai canai social de gra a la competenza de la vize presidenta Nicoletta Riz che à renovà ence l sit internet de la sociazion.
Per chel che vèrda la publicazions, de jené l é vegnù fora l liber »M.J. Vita al temp del malac« metù ensema da Daniele Verra con n grop de joegn e via per de mèrz l é stat dat fora l numer 9 del Almanach che é stat dedicà al temp, coi dessegnes de Ismaele Soraperra e la reflescions di studenc de la Scola Ladina de Fascia.
La Festa del Rengraziament de l’Union di Ladins dedichèda a la scola.
L’Union di Ladins à renforzà la colaborazion col Grop Ladin da Moena per la publicazion e la distribuzion del boletin Nosha Jent e ensema ence a l’Aministrazion de Comun de Moena l é stat endrezà desvaliva scomenzadives per recordèr trei persones che à lascià n segn fort te la vita culturèla de Fascia: Luigi Canori, Tinoto Monech e Zerilo Bora. Ti prumes meisc del an 2021 l é vegnù fora la riedizion del liber de poesies »Do l troi de la speranza« del Tinoto Monech e amò ence la bela publicazion »Cirillo dell’Antonio Bora e la Scuola d’Arte di Moena. Documenti e testimonianze«. L’Union di Ladins, ensema a Comun, Parochia e Grop Ladin se à dat ju ence per tor su bonamans per l restaure del aut relief sora usc de Calonia de Moena del maester Zerilo Bora.
En ultima tel meis de dezember l é vegnù fora amò na neva publicazion rencurèda da Fabio Chiocchetti en coedizion col Grop Ladin, n liber de poesies de don Bruno Daprà che vegn prejentà a Moena ai 9 de jené.
Per chel che vèrda enveze la trasmiscions televisives del 2021 l é vegù fora autres ot puntates de »A Spas per la Ladinia« col president Fernando Brunel che é states manèdes fora su TV Ladina, TML e sui canai social.
Col meis de mé l é stat envià via l nef projet »Saores de noscia tera« n percors de enrescida leà a l’Aisciuda Ladina a la descorida di prodoc de noscia tera con i esperc: Nadia Pitto del Agritur Fiores, Sara Desilvestro e Fabio Romelli de la firma N’Outa, Luigi Iori de Berghin sul seèr e fèr con fegn, l chef Stefano Ghetta e la Mèlga de Fascia tel chèder de la setemèna del azet al Cotura Cafè.
N auter projet che jirà inant ence del 2022 l é »Saeres«, na lingia de video tutorial sun desvalives aspec e mestieres de la comunanza. Del 2021 l é stat rejonà de co fèr la traces a la fascèna e la corones de Avent.
Anter i evenc l é da recordèr la festa del Rengraziament dedichèda a la scola, col detelpai ai Sorastanc da angern e da anché e la raida n muie aprijièda che la sociazion à endrezà a Persenon e Neustift per jir a cognoscer mingol la storia e i lesc del Piscop Daniel Zen da Vich.