Prejentazion del archivie digital del boletin NOSHA JENT 1963-2023
La pruma piata del numer 0 de Nosha Jent, del 1963.
L nef sistem che vegnarà prejentà permetarà de meter en condivijion con duta la comunanza l prezious patrimonie storich, linguistich e leterèr concostà dal boletin del Grop ladin da Moena Nosha Jent dal 1963 en ca, digitalisà, inventarià e catalogà en colaborazion co la firma Smallcodes de Carlo Zoli fora per l 2022.
Te duc chisc egn l boletin à metù adum belimpont n gran patrimonie de scric che se podarà chierir fora per titol, autor o ence demò tras na parola tel test. L archivie ne sporc scric che rejona de storia, memoria, conties, letradura e informazion; n regoi granac de argomenc e stii desferenc che à jà desmostrà sia gran valuta per la enrescides de carater linguistich.
Te chesta ocajion l Grop Ladin da Moena aur ofizialmenter l an de festejamenc per i 60 egn de Nosha Jent, che jirà inant fora per dut l an. La scomenzadiva vegn portèda dant sul Pian de politica linguistica del Comun general de Fascia e col contribut de la Cassa Rurala Dolomites.
La storia – en curt
L era l an 1963 canche vegnia fora l prum numer de “Nosha Jent”, l boletin del Grop Ladin da Moena. L Grop aea tacà a se meter ensema del 1962 con chela de tegnir vif e svilupèr l lengaz moenat, e l prum obietif che i se aea metù dant l era stat de enjignèr n foliet periodich. Enlouta no l era sorì desche ades, ge volea meter ensema i scric, enjignèr la maerisc per dapò fèr i sfoes ciclostilé e i manèr fora per posta, metan ence de persona i scioldi che servia per dut chest.
Da Nadèl del 1963 vegnia fora l prum numer, n “numer unich” olache l Grop Ladin da Moena se prejentèa formalmenter, col intervent del ombolt de Moena Angel Weber e del prum president Batistin Techel (Giovanni Battista Volcan).
Da enlouta, pur con vèlch paussa anterite, l boletin “Nosha Jent” l é vegnù fora per 60 egn alalongia: dalbon n record portèr inant per duc chisc egn n sfoi con la soula forzes de n paisc, a cheles che ti ultimes egn se à jontà ite ence l’Union di Ladins de Fascia.
Al scomenz l era demò pecia piates, ma les vegnia manèdes fora più de spes, ence ogne meis, a presciapech 200 direzions de posta. Sun chest boletin l era firmes belebon cognosciudes, desche l Tinoto Dell’Antonio Monech, l Simonin Chiocchetti Maza, l Simonin Sommariva Tonolerchie, l giudize Giacomin Jellici Mantino, a chi che se à jontà ite desvalives colaboradores, anter chisc don Giovanni Battista Chiocchetti del Moro, la Modesta del Baiz e la Maria Jellici del Garber, femena del Tinoto e tropes etres. Del 1969 l é mudà format e l boletin l é stat manà a stampèr; anterite l é stat ence vèlch moment senester olache per jir inant se à dat gran da fèr l Simonin Maza, e del 1975 l é ruà la “neva generazion” con Ruggero Chiocchetti Baiz, Fabio Chiocchetti del Goti e etres. Ence dapò no l é mencià i momenc senestres, ampò l boletin “Nosha Jent” é ruà fin a nos e ades l vegn fora belebon regolarmenter con 4 numeres al an.
