Co engaidèr l camejot
L é tost fenì l istà e pec l é amò i apuntamenc che domana che la femenes fascènes se tire ite l guant. L temp del an olache se l doura de manco l é l meis de november, do i Sènc via, e ge volessa l engaidèr ite. Ence fora per l an l é na dreta vida (più asvelta ma segur no manco de utol) per meter via l camejot. Se cogn aboncont semper stèr ascorc a l meter via coche carenea.
Per chest l’Union di Ladins de Fascia à volù tor su, col aiut de Lodovica Zacchia de Fiama, la mior vida de engaidèr ite con fil e voia e rencurèr l camejot. Co se fèjel a l meter via, via per d’uton, canche no se l doura più per n lonch trat de temp? Lodovica la ne moscia ence coche ela consea de meter via l camejot fora per l istà, anter na sortida e l’autra.
Per chest nef ‘Saeres. Tutorials de tradizion e mestieres fascegn’ aon da rengrazièr per la desponibilità bensegur Lodovica, l Folclor da Soraga che ne à dat lèrga te sia senta, la firma Filmart che à lurà fora l filmat e l Comun General per l sostegn economich.
Podede l veder online sul canal YouTube de TV Ladina a peèr via da insnet, da les 17 (vardage al QR code chiò apede). Sun nosc sit internet e sun nesc canai social, podede troèr vèlch informazion en più ence en cont a coche se rencura dut l guant da ela e da el.
Chiò sotite ve lascion enveze i 10 comandamenc de Claudia Conta per engaidèr ite l camejot.
I »diesc comandaments« per l camejot bel ingaidà
L camejot l va scialdi ingaidà ite canche no se l tol; ence canche se l tol e se se l tira ite n’outa do l’autra, ge vel l ingaidèr che senó l se desgaida e l doventa n’ombrela;
L camejot l é bel demò se l é bel ingaidà, se desfèsc fora n camejot canche se se l tol a jir a la fascèna o a l’antica;
Canche se l doura n muie, da n’outa a l’autra, se pel ence bele l rodolèr ite;
A balèr ge volessa l tegnir mingol insema con na man;
Ge volessa che l camejot no staghe sot al temp, se l ciapa l tumech o l’èga l se desgaida più sorì;
A fèr delvers ge volessa bagnèr ite l camejot con èga o èga da zucher dant de l ingaidèr, l ingaidèr ite mol;
Lascèr sièr ite l camejot dant de l rencurèr te cassabanch o te armer
A l ingaidèr ite tor fil mingol gros, (chel da cojir a man o chel da lurèr a acherle) e na voia lèngia;
Se injignèr de picui toc de peza per fermèr l fil da les pèrts forinsom la gaides o ence vèlch boton veie;
Trèr ite l prum fil giusta soraite l spighet (brach: stringot) l secondo anter l spighet e l veludin, l terzo n deit sora l veludin e dapodò amò doi outes ite fin sotite la bostina.