No l é demò n liber de retrac, l é n liber che ne conta de noscia jent, chela che ne à dat la vita. L nef liber »Fascegn. Retrac de jent da zacan« de l’Union di Ladins de Fascia é stat prejentà en mercol ai 4 de mé te sala del Oratorie de Poza, te la setemèna de l’Aisciuda Ladina.

Na regoeta de 250 retrac en bianch e neigher che vegn dai archivies de la redazion de La Usc di Ladins de Fascia che dal 2003 publica ogne setemèna l cianton ‘Chi él pa?’. Chisc l é demò na pèrt, na selezion anter 600 retrac che la jent à portà ti egn te redazion a Sèn Jan.

»L era da n pez che l president de l’Union di Ladins de Fascia Fernando Brunel portèa dant l’idea che chisc retrac posse vegnir regoec te n liber da poder ge dèr fora a duc i fascegn – à dit dantfora la coordenadora per Fascia de La Usc di Ladins Lucia Gross – ampò ge meter man e ge dèr n orden a dut chest material no l era sorì. Gran merit ge va per chest a Nicoletta Riz che à tout su l’endesfida e l’à fat dassen n bel lurier.«

Retrac che vegn donca da la rubrica de La Usc di Ladins che ti egn à abù dassen n bon ejit e che l é stat per la redadores del sfoi n gran arichiment. »L é stat per me na gran oportunità per cognoscer neve persone – à dit Lucia Gross – chele che no fasc la cronaca ma che fasc la comunanza. A ele e a duc chi che à didà a meter ensema la rubrica l é dedicà l liber.«

L liber ge é stat sport a Manuela Rossi e a Lucia Soraperra en recordanza di doi letores più fidei de la rubrica su La Usc di Ladins: Carleto del Baila e Lino Medico.

A Lino Medico e Carleto del Baila

No la é stata cernuda adinfal la data dai 4 de mé per prejentèr l liber. Giusta acà n an se n jia Lino Soraperra Medico, un di informatores più fidei e engaissé de la rubrica. »Lino no l spetaa che rue l postin con La Usc a ciasa, l jia da doman te ofize de posta a se la tor percheche l cognea ge vardar al retrat e veder se l era bon de cognoscer fora la jent – à dit Lucia con comozion. Ogne setemana l ne telefonaa e se no l era bon de endoinar chi che l era su (dalbon dinrèr) l telefonaa istesc a ne dir che l cognea uzar su bandiera biencia. Per chest a Lino Medico aon volù ge dedicar chest liber ensema a n’autra persona, Carleto Rossi del Baila, che con gran piajer l à seghità a ne portar i retrac, ence canche la sanità l’à scomenzà a l far stentar«.

Per ge consegnèr l liber en segn de recognoscenza l é stat chiamà fora Lucia Soraperra, fia de Lino Medico, e Manuela Rossi, neza de Carleto del Baila. Duta does con gran comozion à rengrazià per l bel pensier e l don dassen aprijià.

N cianton de vita, na testimonianza che resta tel davegnir

N muie de jent à tout pèrt a la prejentazion del nef liber »Fascegn. Retrac de jent da zacan«.

»La rubrica ‘Chi él pa?’ su La Usc di Ladins l é la soula anter la desvaliva rubriches del sfoi che é jita inant per coscita tenc de egn – à dit la presidenta de l’Union Generela di Ladins dla Dolomites Milva Mussner. Per ge stèr do ge vel empegn, costanza e responsabilità. L é n cianton che fidelisea i letores e chest l é de valuta percheche, ades che l é ence l liber, l é na testimonianza che resta tel davegnir.«

No à sconet sia emozion nience l president Fernando Brunel che à vedù se concretisèr sie ensomech. »Da chisc retrac se pel entener n muie de robe, se pel veder la vita grieva che aea noscia jent, se pel veder l mudament che l é stat te noscia comunanza.«

Nicoletta Riz: l é n liber de la jent e da la jent

N regraziament fort da man de duc é jit a Nicoletta Riz, la curatora del liber. Ela, con fèr gustegol e lijier, l’à spiegà l gran e lonch lurier che l é stat vindò a chesta publicazion: tor cà duc i retrac, fèr na selezion, jontèr ite la didascalies e olache no les era segures fèr n control. »Per me l é stat n muie bel esser protagonista de chest liber – à dit Nicoletta Riz – l é stat na gran endesfida ma à paà la speisa. Chest l é n liber de la jent e da la jent e volesse rengrazièr duc chi che me à didà a vardèr fora i retrac, a recognoscer la jent, a comedèr ite i fai. Spere che chest liber l posse vegnir aprijià.«

Anter duc chi che à didà l é stat rengrazià Claudia Conta, Gigio e Nives Iori, Antonia Micheluzzi, Giorgio Pedron, Raffaele Rizzi, Christian Bernard e Genio Weiss.

N liber no l doventa zenza l lurier de la grafica e de chest se à cruzià Giuditta Soraperra. »Chest l é stat mie prum liber, no l é stat sorì, al scomenz someaa n lurier de n meis, a la fin ge é lurà do sie meisc, ma ence gio é podù emparar n muie da chesta esperienza e rengrazie per l’oportunità che me é stat dat.« La grafica é moderna, chièra, la moscia anter la piates i colores de la bandiera fascèna.

Tinultima l é stat rengrazià n auter protagonist del liber, chel bel piciol grignolent su la soracuerta con te man n bel maz de steiles da mont: Walter Lorenz da Vich. L é stat cernù chest retrat anter duc percheche l simbolisea la vita, la legreza e la semplizità.

I saluc e i complimenc é rué da la responsabola del Ofize di Servijes Linguistics e Culturèi del Comun General de Fascia Evelyn Bortolotti e da la presidenta del Istitut Cultural Ladin Lara Battisti: »Chesta publicazion l é n patrimonie identitarie de gran valuta, la ne conta la storia de che che sion stac, la ne dasc l met de veder coche la jent e l teritorie é mudé. Melaures da tegnir da cont.«

L president de l’Union di Ladins de Fascia Fernando Brunel ge sporc l liber a Walter Lorenz da Vich. Ensema a el, da m. c., Nicoletta Riz, Lucia Gross, la presidenta de l’Union Generela di Ladins dla Dolomites Milva Mussner e Giuditta Soraperra.

I rengraziamenc a duc chi che à didà

Lucia Gross ge à amò sport n fort develpai a duc chi che ti egn à didà a tegnir su la rubrica su La Usc di Ladins, anter duc te chest ultim temp Bruno Ghetta de Martin e l’à envià la jent che l’à retrac veies te majon a i portèr te redazion. N bel develpai l é jit a la Cassa Raiffeisen de Vich, al Consorzie Eletrich de Poza e a ICL per se aer comprà ju i libres, a don Andrea che à metù a la leta la sala del Oratorie, a la femenes da Poza che à enjignà de bogn grostoi e ai doi sonadores Stefano Ganz e Marco Barbolini che à viventà la prejentazion con sia sonèdes coi orghegn da mantesc. L liber é da poder comprèr te senta de l’Union di Ladins a Sèn Jan al cost de 28 euro.

Monica Cigolla