La é jà en stampa e prest la sarà da poder tegnir te man la neva publicazion de l’Union di Ladins de Fascia dal titol »Fascegn. Retrac de jent da zacan«.

Se trata de na regoeta de passa 250 retrac veies, cernui fora anter i più che 600 che fèsc pèrt del archivie metù ensema ti egn da la redazion fascèna de La Usc di Ladins per la rubrica.

Su la piates del sfoi ladin defat se aea tacà dal 2003 a publichèr n retrat da zacan tel chèder de la rubrica »Chi él pa?«, domanan l aiut di letores per saer chi che l era su e aer vèlch informazion. La rubrica à abù fin da sobito gran aprijiament e la jent à tacà a portèr i retrac che i aea te cèsa, te pech temp donca l archivie à scomenzà a dombrèr n muion de retrac, de gran valuta ajache i sporc n chèder emportant de la vita de la val, con sia jent, sia usanzes e sia storia.

Te la consaputa de chest l president de l’Union Fernando Brunel l era da pez che l portèa inant l’idea de realisèr na regoeta che bine ensema dut l material, ampò ge dèr strutura e endrez a dut chest no l era segur sorì: a tor su l’endesfida l é stat Nicoletta Riz, la vize presidenta de la sociazion e l’à fat dassen n gran lurier.

Chesta publicazion l é n emportant tassel che va a se jontèr a la pecia regoeta fotografiches che aon a la leta en cont a noscia comunanza fascèna – l’à scrit te la notes a l’edizion la curatora Nicoletta Riz. I retrac ne moscia a na vida direta coche se vivea enlouta, i ferma n moment de vita, i ne porta dant n toch de la storia de persones, cosses e lesc. L é n strument utol e universèl per ge fèr entener a duc nosc passà e noscia storia, e amò apede l ne met dant l gran mudament che ne à portà a la realtà de anchecondì. La fotografia ne disc de che tempes sion fies e la soscedea recorc, encresciujum e sentimenc.

Timpruma i retrac é ordené aldò di argomenc per didèr chi che lec a entener i desvalives aspec de noscia storia e tradizion. I é stac metui en orden cronologich e, olache se à podù, i é stac spartii ence per paijes. A chesta vida, man a man che se va inant a lejer, se se n’ascorc del mudament semper maor che à ciapà ite noscia val, no demò en cont al ambient ma ence a la jent e a la sozietà.

Ogne retrat à na didascalia, per gran pèrt touta da chel che era jà stat scrit sui numeres de La Usc, ma completèda per chel che l é stat meso con inomes de persones e etres detaes che mencèa. Per chest l é stat metù su n grop de revijion che l é stat de gran didament.

Su la neva publicazion se pel veder passa 250 bie retrac, veies de enteres storich e curiousc.

»Se ence che no é nesciuna cognoscenza storica de noscia jent – l’à jontà amò la curatora - pèrto mia per embastir chest'opera l é stat de assoluta emportanza la memoria visiva. A embastir n volum con passa 250 retrac, cernui fora anter più che 600, l é stat de besegn de tor demez la fotografies fates te la medema ocajion o con la medema jent, les confrontèr una co l’autra, aer didament ence da de autra publicazions.«

Gran atenzion ge é stat resservà al inom de ogne persona: se à chierì, olache l é stat possibol, de mantegnir l cognom de familia per la femenes e per duc l sorainom de cèsa, te la consaputa de l’emportanza che l à te noscia sozietà.

Merit donca al president Fernando Brunel per aer spent acioche chesta publicazion vegne realisèda, a Nicoletta Riz per la aer rencurèda con pascion e ferstont e a Giuditta Soraperra per l lurier grafich modern e gustegol. Ampò gran merit ge vel ge l recognoscer ence a La Usc di Ladins e a duc si letores de che ti egn à sport n didament prezious e fondamentèl per meter ensema chest bel mosaich de la storia di fascegn.

La prejentazion de chest nef liber vegn fata tel chèder de l’Aisciuda Ladina te Oratorie de Poza en mercol ai 4 de mé da les 16:00 con mingol de musega e zeche de bon da cercèr. Te chesta ocajion l liber vegnarà dat fora a n priesc rebassà. Ve speton!