Che colores, che pitores!
L à dassen garatà l cors de depenjer a la fascèna rencurà dal artist e President de l’Union di Ladins de Fascia Fernando Brunel portà dant ensema a la Cooperativa sozièla Oltre de Ciampedel. Per cater outes 15 aprendisć curiousc se à binà per emparèr a durèr penie e colores aló da la Boteiga Ensema te zenter comerzièl, averta del 2020 per ge dèr luster ai prodoc de la Cprativa sozièla Oltre. Chest l é un di apuntamenc de l’Union di Ladins per valorisèr l’èrt di pitores fascegn.
Saeres. Tutorials de tradizions
La scomenzadiva é nasciuda tel chèder de Saeres, per ge dèr valor e slarièr fora a na vida desvaliva na veiora tradizion de Fascia, apontin chela de la pitura. De jené, per endrez de Nives Iori e Nicoletta Riz e la colaborazion de Filmart, te berstot de Fernando ja Soraga l é stat tout ju n curt tutorial. Apontin chisc dis, en ocajion del cors, l é stat slarià fora sui social de la sociazion, sul canal YouTube de TV Ladina e sui maxischermes de Ciampedel, Cianacei e Dèlba. L filmat moscia a na vida muie scempia co depenjer de bela reses per fornir na cuna.
L cors a Ciampedel
Segur no bèsta ge vardèr a n filmat per emparèr, ge vel proèr e proèr. Apontin chest l é stat l cors endrezà a Ciampedel te cater scontrèdes, en lunesc ai 4 e ai 11 e en mercol ai 6 e ai 13 de oril. Do na curta introduzion storica sul moviment emigrant di pitores fascegn del Otcent, su de picola breotoles i partezipanc à fat fiorir reses e nègherles, ucie e simboi religiousc.
L maester del cors Brunel ge à dat a si studenc de bogn consees, frut de egn e egn de lurier te chest ciamp: »no mescedà tant i colores, vardà che i passenee un col auter, vardà de aer la man slendra. Ogne pitor te sia èrt met sia intimità, te ogne sie lurier se veit sia persona«.
Te ogne apuntament i aprendisć ge é jic do a pitures storiches di fascegn toutes dal liber ‘Pitores e colores’ del Istitut Cultural. A la fin de ogne lezion i utenc de la Coprativa Oltre ge à sport n bon marendel ai partezipanc che, do n’oreta e mesa de lezion, i à podù se fèr doi ciacoles.
A la fin del percors, de breotola brunes no n é vanzà nience una, dutes les se à fornì de fiores e picoi ucie de ogne forma e color. Che emozion per duc veder ciutèr fora dai penie duta chesta marevees!
L’Union di Ladins rengrazia de cher la Coprativa Oltre per la bela colaborazion e desponibilità e l Comitat manifestazions de Ciampedel per i desć duré per l cors. Corsisć e maester se à jà dat apuntament per chest uton per n cors avanzà, e per chi che no à podù tor pèrt a chest prum percors de formazion sarà na seconda edizion.
Vèlch autra scomenzadiva
La sociazion per chest an l à tel cef amò vèlch scomenzadiva per valorisèr e fèr cognoscer i pitores fascegn e sia èrt. Una sun dutes na raida al scomenz de messèl a la Krimmler Tauernhaus, na utia te l’Austria olache te stua amò resta testimonianzes del passaje de chisc artisć migranc. Segur na proponeta de gran valuta culturale e de enteres storich, na scomenzadiva che vegn da nef portà dant do l bon ejit abù del 2019. Se endrezarà dapò ence na raida a pe, semper con Fernando Brunel, per jir a descorir la pitures di pèstres forin Fiem, che durèa ence ic, desche i fascegn, l bol del Latemar. Vegnarà prest prejentà dapò n curious projet modern, portà dant con i joegn imprenditores de Utol Ceramica.
Descheche se disc de solit, no spoileron massa! E ve lasciaron descorir a vo man a man duta la scomenzadives che la sociazion portarà dant ti meisc che vegn!
Nicoletta Riz