Enjignon ensema de bie eves da Pèsca!

Inant Pèsca ence te Fascia l era l’usanza, e la é amò anchecondì, de entenjer o depenjer i eves.

Simon de Giulio te sie liber Usanzes e lurgeres da zacan l conta che l era la touses che les i entenjea la sabeda sènta, sot l eie ascort de la mères che ge ensegnèa co fèr: les i fajea ite con schiufes de cigola o autra erbes, les i ciolèa col fil da cojir e les i chejea te la tentura, acioche i ciape n bel color e do les i onjea con na gocia de elech a na vida che i dovente bie lustres.

Su co fèr per entenjer i eves con erbes e prodoc de la natura, l’Union di Ladins de Fascia aea fat l an passà n tutorial de sia lingia »Saeres«: podede amò l veder chiò apede.

Ades la sociazion à pissà de endrezèr n picol cors olache, apede a veder dal vif co entenjer i eves (enceben che con chesta Pèsca bonoriva no sarà sorì troèr de bela erbes) se pel ence emparèr a i sbetèr e i depenjer a man con decorazions desferentes per fèr l èlber da Pèsca o fornir su la majons per chest temp del an.

L cors vegn metù a jir a en vender ai 22 de mèrz, da les 3 domesdì te la Ciasa de la Moniaria a Sèn Jan, con Fernando Brunel e Letizia Soldà. L cost l é de 12 euro a persona (10 euro per i sozi) e l tol ite i materiai che serf.

I posć é limité, donca chi che à enteres i é envié a se prenotèr al più prest, e aboncont dant dai 15 de mèrz. Se pel domanèr informazions al numer 0642 764545 e se prenotèr al medemo numer (ence whatsapp) e sui canai social de l’Union di Ladins. Ve speton!