Prejentazion del liber “I ladini fra tedeschi e italiani” de Luciana Palla

L’Union di Ladins de Fascia e l Istitut Cultural Ladin Majon di Fascegn, endreza la prejentazion del liber “I ladini fra tedeschi e italiani. Una comunità di confine: Livinallongo del Col di Lana/Fodom 1918-2023”.

L liber de la scritora fodoma Luciana Palla - dat fora da Cierre Edizion adum col Istitut Cultural Ladin “Cesa de Jan” del 2023, giusta 100 egn do la spartijon aministrativa di Ladins te 3 Provinzies e 2 Regions desferentes - l é la verscion smaorèda e agiornèda col tor ite i egn dal 1948 a anchecondì de la publicazion del 1986. Se trata de na opera zis de valuta che la à dat l met de studièr la storia del popul ladin de gra al rigor scientifich recognosciù de l’autora.

Chest liber conta de la posizions toutes, de la ilujions e de la speranzes de la comunanza de Fodom, col meter dant ence la strumentalisazions politiches padides dessema con la autra valèdes ladines de la Dolomites fora per la pruma metà del Nefcent: co la Gran Vera e l passaje da l’Austria a la Tèlia, la opzions, la Seconda Vera e i egn do la vera, ruan al svilup economich e ai tempes de anchecondì. Luciana Palla ge va do con n eie ascort al nascer e al mudèr de na coscienza identitèra che aldidanché i Ladins cognessa fèr amò sie per ge vardèr con gaissa al davegnir.

L liber “I ladini fra tedeschi e italiani. Una comunità di confine: Livinallongo del Col di Lana/Fodom 1918-2023” vegn prejentà te na scontrèda con l’autora tel chèder de la scomenzadives de l’Aisciuda Ladina 2024 en vender ai 12 de oril, da les 5 domesdì, te sala grana de la Majon di Fascegn a Sèn Jan.