‘fac’ rua a piz

L artist Ismaele Soraperra.

Con ‘fac’ nr 6 rua a compiment l projet grafich del joen artist da Gries Ismaele Soraperra, tout su e portà dant via per l 2023 da l’Union di Ladins de Fascia. 6 operes, una ogne doi meisc, per meter sun desch n stimol de reflescion sui fac che sozet te noscia valèdes e più dalonc. Con sia veièda averta al mond, Ismaele à portà te Fascia n stument per dessegnèr, osservèr, analisèr e valutèr chel che aon ditornvia, chel che ne tegn leé a noscia reijes, ma ence chel che ne spenc envers neves orizonc.

Se é ponté via da le ‘reisc’ per meter dant le ‘ousc’ vejine e dalonc, beles e burtes, zenza mai se desmentièr da coluna ‘tera’ che vegnon, vardèr a chela ‘america’ che à semper raprejentà n ensomech ma che fosc ades é doventèda più n strassomech, e sentir che chela ‘sènta’ l é aboncont noscia segureza, e na ‘femena’, chela che ne dèsc la vita e che sera n cerchie per se tachèr ite endodanef te la reijes fortes, staifes, ladines.

‘femena’ l é belapontin l titol de l’opera grafica nr 6 de Ismaele Soraperra che ne met dant i fac sozedui ti meisc de november e dezember del 2023. Via per l an passà l’Union di Ladins à endrezà ensema al artist e a Nicoletta Riz, autora del test che compagna l’opera, cater momenc de debatit, de reflescion, de baratament de idees e ponc de veduda. Tel cors del an, anter l grop che à tout pèrt ai evenc, l é vegnù fora de bela idees, de bie confronc: l é stat rejonà de tradizions e de leames che ne tegn ciolé a chel che l é vegnù do ca te noscia val, ma ence de fac de cronaca più gregn che l é sozedù te teres che no cognoscion ben, che ne somea dalonc, ma che tinultima tant dalonc no les é. L é stat rejonà de veres, de mudament climatich, de litazions, de trafich, de limic e n muie de auter, per vardèr con eies ladins sorafora nesc confins, chi reèi e chi te nosc cef.

Per orir più che l é meso l debatit e per tor ite ence i joegn, l’Union di Ladins à pissà a na neva senta per la prejentazion de l’ultima opera e per serèr su l projet. L projet grafich ‘fac’ vegnarà serà su te Liceo artistich a Sèn Jan, en vender ai 2 de firé da les 11:00, en colaborazion con la Scola Ladina.

Te chesta ocajion Ismaele rejonarà te anter studenc e ensegnanc e a duc chi che tol pèrt ge vegnarà sport duta 6 la operes grafiches autografèdes dal autor e ciolèdes ensema. La scontrèda é averta a duc.

Monica Cigolla, Cianton de l’Union, La Usc di Ladins 4 del 2024