De vera, de pasc e de comunanza

Stimè abonè,

scomenzon con chest prim numer de l 2024 col scriver de guera e de pasc, con articoi che recorda i 10 egn de la Mostra “La Gran vera” jun Navalge ma ence con testimonianze de la Seconda e n pensier su chele che ne tocia veder tel mondo.

A doi egn dal scomenz de la guera anter Russia e Ucraina e da pöc mesc da chela anter Israel e Palestina, la vöa de pasc la é semper più forta.
Le coscienze che no azeta la forza de le armi, ma che mira e cré al dia- logo, a la solidarietà tra le persone, le urla: “Basta sbarar, basta mazar!”, le se sproa a far sentir sova osc, ma se n dijesse che nesciugn i le scoita. Ogni di ne vegn moscià chel che suzet su la televijion e sui giornai, ma sion tant usè a veder de cheste meserie, anter int gossip, quiz, talk show e reclam, che col temp se risćia che no le ne toce più. Aon burc segnai de indiferenza e mencianza de sensibilità per chel che suzet.

Sione tant stremì da serar i ölges davant a chel che ne disturba o no ne piasc? Crese proprio de sci, dijesse che te tante situazion lascion esser, fajon mena de no veder, valuton che fosc no convegn dir chel che se pensa: chest se chiama oportunism, menefreghism, esser faich, per no tirar ca autre definizion.

Ence se aon la possibilità de aver mile porte averte sul mondo, stenton semper de più a veder chel che aon pede ju ciasa, percheche meserie e dejajes ge n é ence te ste val e te nösc paesc.

Jir a tociar cerc argomenc su n picol boletin come Nosha Jent, nasciù per defener nosce raisc e per no desmentiar noscia storia, l é utol per tegnir fe a chest mandat. Noscia tera de confin la é stata martoriada da la guera, se pol ancora veder su nösc monc le feride che l’à lascià e per chest se sention en doer de ge star apede a chi che padisc, a chi popoi e chi inozenc che vif cheste gran tragedie.

Ma aon ence nosce comunità da tegnir da cont, noscia jent. Comunità che à besogn de crescer e de miorar, acioche nesciugn se sente emarginè, desmentiè. Con l’ocajion envie duc chi che pol o à enteres a partezipar al Concors “Nosha Jent”, come che podede veder chigiò sot int.

N bel salut,

Angela del Goti