366 cartolines de Fascia

La soracuerta del liber “Ciantons. Cartolines e proverbies da zacan”.

Do l liber »Fascegn. Retrac de jent da zacan«, la regoeta de retrac veies vegnuda fora del 2022, l’Union di Ladins de Fascia dèsc fora n’autra publicazion. Na regoeta de cartolines veies, en dut 366, dutes en bianch e neigher che empienesc 366 piates del an.

N liber fotografich rencurà da Nicoletta Riz che à vardà fora e cernù la cartolines da la gran regoeta personèla de Fiorenzo Secchi Floz da Ciampedel che bolentiera l les à metudes a la leta per chest nef liber.

L é ciantons de Fascia, da Fedaa fin ja Moena, che conta de coche l era nesc paijes, noscia atività turistiches, noscia cèses e jent. Chèrtes de posta viajèdes, timbrèdes o demò stampèdes, beleche dutes anter i egn Cincanta e Setanta. Picoi chèdres riches de particolères che ne moscia l mudament e l jir del temp, ma ence mizacoles de vita de enlouta, de canche ruèa i prumes turisć, de coche vardèa fora i prumes hotie, la pruma uties sa mont.

Na fenestra sun noscia val

»Fajon n saut tel temp – scrif l’autora Nicoletta Riz sun sia introduzion al liber. Mascima ti egn Cincanta e Sessanta la chèrtes de posta les ciapa pe te noscia valèdes e da spes l é n strument de biot reclam turistich. De paijes e hotie, lifc portamont e uties, n maraut che conta chi egn te Fascia. Con la cartolines de Giuseppe Ghedina, Lorenz Fränzl o di frèdes Orempuller, ma ence di fascegn Guido Iori Rocia, Michelangelo Zulian e Pio Florian, anter i etres, vedon endirao na Val che la se dèsc ju per ge corer do al svilup economich-turistich che l é stat arjont enscin anchecondì.«

No mencia se sà ben vèlch chèrta de posta ence del prum fotograf de la Dolomites, Franz Dantone Pascalin, che moscia retrac de familia ma ence de lesc maraveousc e maestousc. Apede a la scrites e a la data de la cartolines l é stat publicà na curta descrizion del lech tout ju, con toponimes, stories e recorc de familia. Informazions che Nicoletta à metù ensema de gra a n grop de jent che l’à didèda: Nives Iori, Claudia Conta, Christian Bernard, Raffaele Rizzi e Stefano Weiss.

Chèrtes de posta e proverbies

Apede a vigni fotografia, a fèr amò più rica la publicazion, l é na lingia de proverbies che é stac biné su e publiché ite per i egn Setanta e Otanta da Simon de Giulio e Otavio Doliana. Chisc proverbies é stac touc da Mondo Ladino, la revista del Istitut Cultural Ladin e mantegnui te sia carateristiches del lengaz brach e cazet, apede l é stat metù ence la traduzion per talian.

»Chest gran Melaur l à da ruèr te duta la stues – scrif l president de l’Union di Ladins Fernando Brunel te sia paroles dantfora – per cognoscer miec l’istoria de noscia amèda patria, la Ladinia, che do l temp scur e senester de la Seconda Vera mondièla se verjea al mond.« N liber che ne verjarà na fenestra sun noscia val e che ne farà restèr encanté.

La publicazion »Ciantons. Cartolines e proverbies da zacan« vegn prejentèda da la autora Nicoletta Riz en sabeda ai 4 de mé da les trei domesdì te Oratorie de Poza, sarà ence musega e n picol marindel.

Monica Cigolla, Cianton de l’Union, La Usc di Ladins 16 del 2024