Dal 1 ai 31 de aost a Poza, la mostra "Emigrazion da la Dolomites ite per l Nefcent"

L Comitat Manifestazions de Poza, en colaborazion con l’Union di Ladins de Fascia, met fora per dut l meis de aost te Ciasa de Noscia Jent la mostra “Emigrazion da la Dolomites ite per l Nefcent” rencurèda da Luciana Palla.

“Emigrazione dalle Dolomiti nel corso del Novecento” l é l titol del liber de la storica ladina de Fodom Luciana Palla, dat fora dal Istitut Cultural Ladin ‘Cesa de Jan’ con l editor ‘Bellunesi nel mondo’. Pontan via da chest liber l’autora à studià fora ence na mostra che travers retrac e didascalies la fèsc cognoscer stories de persones e families che tel secol passà era peèdes via do la strèda longia e senestra de l’emigrazion dai paijes de Col, Fodom e Rocia.

L’esposizion vegnarà inaudèda te ‘Ciasa de Noscia Jent’ a Poza en mèrtesc prum de aost da les 5 domesdì; tolarà pèrt ence Luciana Palla, che la medema sera da les 9 la portarà dant na scontrèda de aprofondiment prejentèda da la giornalista Virna Pierobon te Piaz de Comune o (se fossa catif temp) te sala del Consei.

La mostra tol ite presciapech 25 gregn tulins, vigniun con 4 o 5 fotografies con didascalies per italian e ladin, metui fora aldò de n orden cronologich che va dal scomenz del ’900 fin al 1970 zirca e per destinazions e tematiches: chi che é peé via envers l’Australia, l’Argentina o la Svizera, l’emigrazion di mendres, i mudamenc tel temp e c. i.

“La maor pèrt de la fotografies ne moscia na emigrazion ‘neta’, la jent la vardèa de se prejentèr regolèda e petenèda delvers percheche l era la vida per ge fèr saer a cèsa che la era jita ben. Ti retrac no se veit l suor, l paz, la fam, la desperazion che enveze se lec te la letres e che la didascalies deida a entener” disc l’autora.

La mostra, già metuda fora con suzes vin Fodom, jun Busan e via per Belun, la sarà da poder veder a Poza te ‘Ciasa de Noscia Jent’ per dut l meis de aost, duc i dis da les 17.00 a les 19.00 e da les 21.00 a les 22.00.