Prejentazion del liber "Letres da Larcioné"

La soracuerta del liber che vegnarà prejentà en vender ai 8 de setember da les 17:00 te Istitut Cultural Ladin Majon di Fascegn.

Inomes misteriousc de divinità, conties e cherdenzes de orizont pre-cristian, sconjures e ric veiores de fertilità, caraterisea n corpus de tradizions che à sie zenter sul Col de mé, lech magich sun Ciaslir, sora Vich, che Hugo de Rossi al scomenz del Nefcent à tout fora da na lingia de letres, scrites per fascian da n autor che per n pez l é restà descognosciù.

Ades l mistèr se à palesà de gra al lonch lurier de studie fat da Fabio Chiocchetti, che te sia ultima publicazion l ne sporc l’edizion integrala comentèda de duta la letres che Amadio Calligari da Larcioné (1857-1918) ge à scrit ti diesc egn dal 1887 al 1897 a Tita Cassan da Poza (1863- 1905), professor jun Busan e protagonist col Calligari de chel temp rich de enrescides peà via del Otcent, che à segnà per i Ladins l scomenz e l svilup de na autocoscienza etnich-linguistica.

Te chesta letres, la lejendes cognosciudes travers la regoeta de Hugo de Rossi rencurèda da Ulrike Kindl (1984) pel vegnir letes te sia forma originèla e tel contest linguistich e storich-sozièl del temp, per entener l valor de na comunanza che se binèa a fèr vila e coscì la manèa inant lengaz, cultura e tradizions veiores, che à podù soraviver al mudèr di tempes.

I scric de Amadio Calligari l é l spieie fideil de che che i contèa, con esprescions curiouses e enteressantes, e l studie de Chiocchetti valorisea e deida a entener l segnificat e l contest de chel lengaz sćiantif, coi arcaismes conservé da la tradizion orala e i mudamenc, metan dant analisa e coment de passa mile paroles pech durèdes o jites fora.

A chesta vida la publicazion doventa ence n rich “glossarie ladin” che smaora l patrimonie lessical fascian e l ge sporc neves fondamenc ai studies linguistics. N obietif che ge stèsc a cher al autor, ensema a chel de ge dèr giustizia e merit a l’opera del scrivan e bacan da Larcioné, per jir inant tel lurier de valorisèr “duc chi che te chisc egn passé se à sproà a scriver per ladin, lascian testimonianza de noscia mare-lenga.”

L liber Letres da Larcioné. Amadio Calligari a Tita Cassan (1887-1897), dat fora adum da Istitut Cultural Ladin “maion di fascegn” e Union di Ladins de Fascia, vegnarà prejentà dal autor e dal professor de l’Università Ca’ Foscari de Unejia Mario Infelise en vender ai 8 de setember da les 5 domesdì te sala grana del Istitut Cultural Ladin a Sèn Jan.

Ve speton!