Na scontrèda dassen enteressanta chela endrezèda en lunesc ai 28 de mèrz te biblioteca di Licees de Fascia. La doi clasc quintes del Liceo linguistich se à bina per descorir l mond del derit penal, tras la ousc del avocat Andy Rossi.

La scontrèda, endrezèda tras la mediazion de l’Union di Ladins de Fascia (de chela che Rossi l é conseier) e la desponibilità de la dozentes Lidia Rasom e Mariagrazia Degasper, à abù desche argoment l prozes Cappato (de chest vegnarà rejonà la setemèna che vegn te la rubrica sun chest sfoi del avocat Rossi). Ti egn passé la costion à abù gran ressonanza a livel nazional e ti ultimes tempes l’aea da nef ciapà luster do che l referendum su l’eutanasia legala l é stat declarà inamissibol.

Do na curta introduzion sun sie percors personal, emportant ence per ge fèr descorir ai joegn sia profescion, l avocat à fat na sumèda del cajo, de coche l era jit la robes e de coche dapodò se à dejout i momenc del prozes a la Cort d’Assise de Milan. Dassen de valuta la vijion de vèlch moment te tribunèl tout fora da la trasmiscion »Un giorno in pretura« con la depojizion de la testimonianzes, con la domanes del Pubblico Ministero e i intervenc del Giudize. L intervent te clas no l é stat donca demò na scontrèda biot teorica, ma se é partii da la realtà pratega per entener conzec e prinzipies del mond giuridich.

Da chest prum moment de aprofondiment, se à resservà atenzion dapò a chel che l é suzedù do la pruma sentenza a la Cort de Milan, che l à sotrissà n vet legislatif en merit a la costion Cappato (tel spezifich articol 580 del codesc penal). L cajo l é donca passà te man a la Cort Costituzionala, che ge à dat l’encèria al Parlament de destrighèr fora la costion. No aan l obligh, te n an no l é stat fat fora nia.

Enlouta la Cort, ledia da ogne leam normatif semper tel respet de la Costituzion e di deric del om, l à dit che na persona pel dezider de se tor la vita demò se vegn respetà 4 parametres: la dezijion cogn vegnir touta autonomamenter e a na vida ledia, la persona resta en vita demò de gra a tratamenc de sostegn vital e la padesc na patologia che no pel vegnir curèda, che la é fontèna de padimenc del corp e de la ment e che ela enstessa no é bona de sostegnir, la é bona de tor dezijions ledies e en consaputa, condizions e modalitèdes de esecuzion che cogn vegnir verifichèdes da na strutura del servije sanitarie nazionèl e con parer del comitat etich.

Do chest ultim pont se à serà su la scontrèda. Da man di studenc segur l era amò curiosità, e tropa domanes che no à podù, per rejons de temp, esser portèdes dant, ma che ampò vegnarà segur amò tratà te clas.

Nicoletta Riz

A confront col mond te tribunal

Union di Ladins de Fascia