Canori, fontèna de èrt, letradura e cultura a 360°

L era sodesfazion ti eies de Fabio Chiocchetti en domenia ai 3 de oril, a la fin de la prejentazion del liber »Canori. Scric, poesìe e cianzon«; legreza a veder che l publich che aea empienì l teater del oratorie de Moena se n jia content, a sentir i comenc de stima e de marevea per l ecletich autor del Gabana, registrà te sie comun col inom de Ermanno Zanoner (1907-1991).

Desche do chela festa che l Comun de Moena, col Istitut Cultural e l Grop ladin, ge aea fat al Canori del 1981. L’era stat n recognosciment de so valor do egn senestres per chest autor perch conscidrà da sia jent, che ge aea dat la gaissa per poder amò meter ensema scric e musega preziousc.

Da enlouta, per passa 40 egn, Fabio Chiocchetti à seghità a rencurèr la produzion del Canori, daite e de fora dal Istitut Ladin, tolan su desche na sort de ritajon la paroles del Canori: »Per far del ben a ’n anima / el miec che se pol far / l’é de fenir sòva òpera / seghitan a ben far.«

Do aer valorisà soraldut la composizions de musega e dapò i retrac, col didament prezious del nez del Canori e archivist al MART, Federico Zanoner, ades con »Canori. Scric, poesìe e cianzon« se à jontà n auter tassel prezious per la cultura ladina e per la comunanza de Moena e de Fascia, na conferma del valor del Canori desche fontèna de èrt, letradura e cultura a 360°.

La prejentazion

Chest valor é stat uzà fora te passa doi ores de prejentazion de la neva publicazion, ores che é passèdes via coran anter paroles dal vif, proiezion de scric e dessegnes, registrazions de la ousc originèla del autor e de sia cianties, reinterpretèdes da cores e musizisć de stii desferenc, dal jazz a la lirica, palesan n aprijiament che va sorafora sie paisc e sia val e rua te desvalives ambienc artistics.

Compagné da Anna Mazzel, Fabio Chiocchetti e Federico Zanoner se à enterzà portan dant recorc, analises, spiegazions e curiositèdes su la vita del Ermano del Gabana, ma soraldut su la produzion desmesurèda de Luigi Canori, che à tout ite ogne sort de esprescion e de argoment.

A peèr via dal 1925, canche de demò 18 egn, al liceo, l à scrit n sonet che podea someèr bele na scempia rima de ocajion, ma che desmostrèa jà sia cognoscenza de la strutures de la composizion classica e sia capazità de ge dèr valuta e prestije al lengaz moenat con stil e paroles de gran musicalità e calità leterèra.

E dapò i studies de linguistica e fonetica su la »versificazion ladina«, sia coscienza de la strutures gramaticales e sie chierir, jà enlouta, i trac unitères che leèa la valèdes ladines, ence a cost de jir »en rota« col Grop ladin da Moena, che do Heilmann aea cernù na grafia più fonetica e locala.

N livel de cognoscenza e consaputa dassen aut, ma de spes sotvalutà da man di »esperc« ence te la musega, endèna che a  Moena duc ciantèa sie toc più populères.

La colaborazion con la Rai per i programes radio per ladin, l anteveder de sie cugnà Luigi Piccoliori che lurèa a la RAI e la desponibilità de la sor Veronica Zanoner e del nez Federico l é stat la combinazion preziousa che à permetù de tegnir su e meter a la leta l maor patrimonie de scric e de registrazions vocales, olache l Canori rejonèa per ladin de artisć internazionèi, de geologia, astronomia, filosofia e trop de auter, con gran atenzion e consaputa de l’emportanza de chest material per l svilup del lengaz ladin.

L develpai de istituzions e comunanza

Dut chest e n muie de auter l é tel nef liber prejentà e dat fora a duc ensema con n segnaliber col QR Code che permet de scutèr ence la registrazions de la ousc del Canori. Con chesta ultima publicazion, che se jonta apede a cheles dates fora ti egn dal Istitut e dal Grop Ladin, l gran lurier de valorisazion del Canori podessa esser fenì, ma Fabio Chiocchetti ge à passà ades l testamonech a Federico Zanoner, acioche l mete ensema amò la biografia zis enteressanta de chest sie gran bèrba.

Te la prejentazion, viventèda da Maura Chiocchetti e dal didament tecnich de Marco Mattia, i intervenc de Cristina Donei per l Comun de Moena, de Mirella Florian per l Comun General, de la senatora Elena Testor, e de Lara Battisti, Fernando Brunel e Angela Chiocchetti respetivamenter presidenc de Istitut Cultural, Union e Grop ladin da Moena coeditores del liber, i à uzà fora l rengraziament per chest om de cultura che ge à dat n muie a la comunanza de Fascia, e per chi che à lurà per meter a la leta sia opera, portan dant ence vèlch recort personèl.

En video l é ruà ence la paroles de develpai dites con emozion da Gabriella Cornelli, nora del Canori, che à semper sostegnù concretamenter la valorisazion de sia opera e en ultima dal publich l é ruà l aprijiament de la presidenta de l’Union Generela di Ladins Milva Mussner e l apel de Rina Chiocchetti del Moro, che à envià duta Moena a ge domanèr perdon a chest gran conzitadin per no l aer entenù canche l era te sie paisc.

Lucia Gross