Con èrt e poejia l’à uzà fora l bel e l bon del Creat
Veronica Zanoner del Tinoto Gabana.
N muie de jent se à binà en sabeda ai 17 de jugn te gejia de Sèn Vile a Moena, olache l é stat endrezà na messa en recordanza de la Veronica Zanoner del Tinoto Gabana, e en pruma fila ben segur l fi Giuliano Piccoliori, dotor vin Gherdena, con sia familia.
Femena de cultura, Veronica la era sor de Luigi Canori e desche sie fra l’à semper abù a cher sia mèrelenga, l’èrt e la poejia.
La se aea enciasà jun Busan, maridèda con Luigi Piccoliori da Dèlba e canche de aost del 2022, sun sèva di 100 egn, l’à lascià chesta tera, l’à volù che sie cender l vegne portà a Moena. Ades che la paussa per semper te sie paisc, l Comun, l Grop ladin e l’Union di Ladins à volù la recordèr con na bela messa ence te Sèn Vile.
Don Bruno Daprà l à recordà chesta femena che se aea enciasà jun Busan ma l’à semper tegnù n strent leam con Moena, paisc a chel che, desche sie fra Ermanno, la ge à dat trop.
Te la perdicia, pean via dal Vangele sui apostoi, envié da Gejù a dèr per nia chel che per nia i à ciapà, don Bruno à dit che ence Veronica la ne à sport debant sia produzion de artista e poeta, la ne à ensegnà a coltivar la beleza e l amor, l valor de la fantasia e l cher datol e a vardar la beleza, l’umanità e la bontà tel mond, desche te la poejia »Per me l Segnoredie«, che recorda l Cantich de la Creatures de Sèn Francesch.
La zelebrazion é stata enterzèda da vèlch ciantia del Canori con la esecuzion de Angela Chiocchetti, sopran e presidenta del Grop Ladin da Moena, compagnèda al orghen dal maester Fiorenzo Brigadoi e a la fin, travers la bela interpretazion de la ciantarines de »Cianton da Marevea«, se à podù scutèr proprio la poejia »Per me l Segnoredie«, metuda en musega da Fabio Chiocchetti.
A la fin de la zelebrazion la vize ombolta de Moena Cristina Donei à recordà chesta artista che ge à fat onor a Moena, l’à rengrazià l Grop e l’Union di Ladins, la ciantores e l maester e l’à anunzià che chest uton a Moena te la sala Rovisi del Comun vegnarà endrezà na esposizion de si chèdres.
Cianton de l’Union, La Usc di Ladins 24 del 2023, Lucia Gross