Adum te l’Union dò voscia pedies

Stimà Fabio,

noi duc volon te rengraziar per la bela letra che tu ne as scrit. Aldidanché no l’é sorì per i joegn tor sù neve endesfide. Da spes, belapontin, se troon vindant a situazion olache la jent ne disc che no sion assà, che no aon amò la dreta esperienza, che no entenon delvers chel che vegn dit e rejonà. L’é la pruma outa che lejon parole de gran fiduzia, parole che engaissa e ne fasc sentir aprijié per noscia bona volontà e nosc voler tegnir adum. Per noi la strada da far la sarà istesc longia e sfadiousa ma enlumenada e batuda ti egn passé da n grop che à lurà con fondament, pascion e amor per soa tera. Partion a ciaf bas per veder delvers vosce pedie, pedie che no volon scuerjer ma passar fora con respet, rencuran l troi per chi che à da vegnir acioche ence ic posse meter a vèrda a olà pojar i pie. L sentiment che ve à spent a ruar fin chiò l’é l medemo che ne à dat la forza de se meter a la leta per noscia comunanza co l’empegn de tegnir sù con responsabilità noscia tradizion, noscia cultura e nosc lengaz. Sion joegn fascegn, joegn ladins e no lasciaron che nesciugn smendre noscia identità, nosc esser.

L’Union di Ladins de Fascia l’é na sociazion storica che cogn aer n davegnir e noi sion vertesc a se dar le man dintorn percheche chest posse sozeder. Nosc zil l’é chel de doventar n grop soul ensema a voi che aede maor esperienza, n grop mescedà, rich, metù adum da desvalive generazion che colabora e cresc, che se scouta e se sostegn che met adum forze e energìe, che fosc se scontrarà ma se tegnarà ence per man per passar fora chel che l davegnir ne resserva.

Demò coscì podaron raprejentar e esser l’Union.

Abià pazienza, cognon amò emparar, sià valenc, cognon amò se far ite, didane, aon amò besegn de voi, scutà sù, i joegn à da esser conscidré, no desche grop a sé ma desche persone. Develpai per dut chel che aede fat e arjont tras vosc gran empegn…e ades con gaissa dijon: “INANT ADUM!”

Melissa, Christopher, Nicoletta, Elisa, Damiano, Alice