La speranza per l davegnir!

Stimé fenc e cara touses, che per la pruma outa ve aede metù a la leta per l Consei de l’Union di Ladins! Siede la speranza per l davegnir de nosc moviment e de noscia comunanza: n devalpai bon fort. Con voscia mobilitazion ve aede vadagnà la stima di sozi e ve meritate l sostegn de dut l Consei, ence e soraldut da chi più de età, che pian pian se enjigna a ve lascèr l temon. No ve pesimà a ve tor sù encèries de responsabilità, se l’à da esser: aede na longia strèda tedant e n muie de ocajions per desmostrèr la gaissa e la capazità de interpretèr l’identità de n picol popul tel mond globalisà e conjobièr storia e tradizion con na sozietà che viaja semper più debel.

Dò na sajon de cruzies, olache someèa che l vent tire de rebuf e dut vae dò brea ju, aon te dant n temp mingol più seren. L renovament del Consei de l’Union, la prejenza de tropes jogn che ultimamenter à ciapà ite tel ciamp politich-aministratif, tel mond culturèl e tel sistem educatif, l’é dut segnèi de renascenza de noscia comunanza, segnèi che ne spenc a vardèr con fiduzia tel davegnir.

L’Union di Ladins de Fascia à de bogn fondamenc: na sociazion recognosciuda dal sistem normatif, con ressorses e personal aldò, de bogn leames co la popolazion e coi Ladins de l’autra valèdes, e tost ence na bela senta olache sarà amò più bel lurèr e se binèr. Ma no pissà pa che sie semper stat coscita. Canche del 1976 son ruà per la pruma outa te Consei e i me à dat sù l’encèria de canzelist (aee 23 egn) no l’era nia de dut chest: se binaane de cater te stua de Danilo Dezulian del Garber, enlouta president; aane de contra la politica da Trent e ence chi che rejea la val; canche la jìa ben se ciapèa n contribut de n milion de lire (pech più che 500 euro!) e con chel se cognea fèr fora dut l’an.

Dut chel che l’é stat arjont da enlouta en cà no l’é vegnù ju per ciamin: l’é stat vadagnà con fadìa a forza de struscies e scinternamenc, e ge à volù carant’egn de batalies per veder i prumes resultac. Se ades aon na Scola ladina con trei licees, l’Istitut Cultural, l Comun General de Fascia e n conseier ladin garantì per lege e dut l rest, l’é stat per via che enlouta, e ence dant, zachei se à batù con piesc e con mans per i deric de la mendranza ladina. Fac e inomes s’i troa da lejer te chel codejel dat fora en ocajion di 40 egn de l’Union (“Nosha Jent”, n. 2 del 1995). Vardavene da chi che disc che l passà l’é passà e no joa più nia vardèr endò. No l’é vera: sun majìes e ruìnes, no se frabica nia da bon, per frabichèr l davegnir ge vel de bogn fondamenc. N èlber se no l’à de bona reijes sotes tel teren no l rata, l verjumea e l ceida reversèr, e zenza cognoscer chesta reijes – descheche dijea p. Frumenzio de Martin – zenza cognoscer sia storia n popul no à davegnir. E la storia di ladins no l’é demò chela di Rec, di Vescoves de Persenon e de la veres contra Napoleon, l’é ence la storia del Moviment ladin.

Rencurà e studià la cultura ladina, rencurà l lengaz, VOSC lengaz. No ve contentà de rejonèr fascian, sproave a rejonèr n BON fascian, brach, cazet o moenat che sie. Aede oramai strumenc de ogne sòrt a la leta: dizionères, gramatiches, tesć de letradura, materièi audio e video sorii da durèr.  Vardavene da chi che disc che bèsta se entener, cochemai se rejone, ampò duc disc coscita, o adertura “aon semper dit coscita”. No l’é vera: l ladin te Fascia da cent egn e passa l’é sotmetù a na tèl prescion de interferenzes che l ceida doventèr bel pian n misc-masc, n dialet trentin. Scutà coche i rejonèa chi veies da zacan, lejé chel che i scrivea, e sproave ence voetres a scriver e a coltivèr la mère-lenga. L lengaz l’é l’ènema de noscia comunanza, l fondament de duc “i deric” che ne pervegn desche mendranza, deric che duc adum cognon se meritèr dì per dì, vèrech dò vèrech, ence da chiò inant. Bon lurier!

Fabio del Goti