»fac« per lejer nosc temp con l eie de l’èrt
La pruma realisazion grafica/artistica de Ismaele Soraperra per l projet »fac«.
La dèsc segur tel eie, chela piata duta fucsia con simboi śai. L é la pruma realisazion grafica/artistica che l joen fi d’èrt Ismaele Soraperra da Gries, che fèsc l’Academia de bela èrts a Verona e che l à tanche fenì na esperienza de Erasmus tel Belge a la Royal Academy of Fine Arts Antwerp, ne sporc te chest an 2023.
L frut de n projet che ne compagnarà fora per dut l an, volù dal Consei de l’Union di Ladins de Fascia che à l obietif de portèr inant na ocajion de lejer i fac de nosc temp travers l eie de l’èrt con la colaborazion de artisć de nosc teritorie. L medemo obietif che ne à compagnà per 10 egn travers l lapisc de Manuel Riz e la colaborazion de tropes etres col Almanach. Ades l zicle de chela publicazion se à serà su, ajache dut dura n trat e n trat no dura semper, e n é scomenzà un nef. Per dut l an 2023 vigni 2 meisc, aldò de n confront con l’Union e la Redazion de La Usc, Ismaele Soraperra ne metarà dant sia opera, olache l vèrda apontin de lejer i fac de chest temp con l eie de l’èrt, vardan a noscia picola realtà ma ence a chela de dut l mond per ne sporjer vèlch provocazion e argoment de reflescion.
Chesta reflescions podarà vegnir portèdes dant te la scontrèdes che l’Union di Ladins e l artist metarà a jir vigni 2 meisc te lesc desferenc de Fascia. Ocajions de confront, debatit e crescimonia avertes a duc su prenotazion. Duc chi che tol pèrt i podarà ence ciapèr en don una de la copies (stampèdes en numer limità) de la realisazion grafica/artistica de Ismaele de chel bimester, che vindedò à n test de Nicoletta Riz che dèsc amò vèlch informazion e stimol de più per la reflescion.
Chiò apede podede veder l prum numer de »fac«, che à per titol »Reisc« e lejer l test tel box.
La pruma scontrèda de reflescion e discuscion é en program en sabeda ai 25 de mèrz, da les 16:30 a Cianacei lo da la Mia Majon, visavì la Scola de schi. Podede ve enscinuèr al 0462 764545, ence whatsapp.
LG (La Usc di Ladins 11 del 2023)
“Pascentèr, desche l lat de la reisc. En do tel temp, olache nasc dut cant e da olache rua dut. Generato, non creato. L’Identità ladina se forma anter Ot e Nefcent, anter doi gran nazions che no se ciola, ma che soscedea, che tiza.
Trei fantolins, un enlongiajù l auter, i scrif col śes, i cianta e i conta de na fe veia e veiora. Jirèi amò te gejia? Ic… ma e chi sun Ciaslir scoutei chel che l preve perdicia? Busia dapodò ence chel dal pirol ros, e de el scì che scuton ogne strambaria da pech e nia… Tegnon su noscia tradizion, che fona sia reijes te la fe, te la spiritualità e tel ferstont, te la vita pureta.
La vita pureta da enlouta la é ben jita a se fèr benedir (de gra!): “Pien su la Dolomites per jir coi schi: 207mile schiadores sui 1200 km de portoes del Dolomites Superski”. Su na tera da seides, numeres zenza confin can scomenzarèi a vegnir strenc? Ot e Nefcent à metù adum l’Identità de n popul: adum aldidanché ence sot na gran ombrela identitaria de profit… Endèna che dombron, esauresc l’èga, che ne spetel chest istà? Chel verdeèr apedejù chela sief él speranza, él mudament?
Descheche lejon sui sfoes di passajes sun nesc portoi, lejon ence de la vera te l’Ucraina, sun nosc usc maester. Jent che padesc, families che se spartesc, che lascia cèsa sia e sia reijes. Scuton su i leader del mondo rejonèr de sora en ju de vera e de penzin e de gas, oramai noscia vita… Scuton, desche se scutassane su la conferenza stampa de Sanremo.
Jir a fon, ge vardon a nesc valores da zacan e d’aldidanché, che se mesceida, che se renova.
”