Virgilio Soraperra de la Zoch (1937-2015)

Virgilio nasc ta Dèlba ai 20 de oril del 1937 da Alfonso Soraperra de la Zoch e Francesca Iori de Mita. L cresc te na familia de artisć e la pascion per l’èrt l’é sie naturèl, ma dò la scola populères l cogn didèr te cèsa e no l pel jir inant a studièr. Del 1949-’50, amò joenet, l deida sie père a depenjer i parees del teater e de la Villa Emma de Dèlba. Te chi egn l taca a lurèr desche sbianchejin e l fèsc ence caricatures per “Il Postiglione delle Dolomiti” de Guido Iori.

Apede a l’èrt l desmostra n gran amor per la cultura e per l’èrt te ogne sia esprescion, se dajan jù per emparèr, per so cont o con ogne ocajion possibola, n muie de robes: l studia l todesch, l’empèra a sonèr l’orghen e la chitara, l lec la Divina Comedia e l scrif n diarie rich de n muie de referimenc storics e de reflescions. L fèsc l’ator e la scenografìes per la filodramatica de Dèlba e Penìa e del 1958 l se scrif ite a l’Academia d’èrt, ma l cogn lascèr sù. L troa lurier desche postin e del 1965 l se marida.

L fèsc desvalives lurieres, endèna l seghita a depenjer. Del 1981 l venc l pest per zipiadores de faceres metù fora da l’Istitut Ladin, l taca a ciapèr nonzech desche pitor de murales e del 1982 l se scrif endò ite a l’Academia. L’èrt pel zacan esser sia profescion: sia pitures fornesc cèses e hotìe te Fascia e foravìa, l tol pèrt a esposizions coletives e personèles, l fèsc faceres e l fèsc e restaura utères, sia gran pascion. L porta inant e l ge passa la ritajon artistica de familia ence al fi Claus. L mor a Gries ai 17 de mèrz del 2015.

[Biografia touta fora dal Almanach 2020]