Bepi Dellantonio Mòghen (1899-1984)

L dotor Giuseppe Dellantonio, Bepi Mòghen per la jent da Moena, l’é cognosciù te Fascia soraldut per esser l’autor del vocabolèr moenat-talian.

Vèlch de più de chest om, “che tant à fat per so paìsc, per la cultura e la rejonada de soa tera ladina” ne vegn cà da n scrit de Simonin Chiocchetti Maza publicà su La Usc di Ladins e sun Nosha Jent del 1984.

Giuseppe Dellantonio l’é nasciù a Moena ai 17 de firé del 1899, l se à laureà en letres e filosofìa e l’é semper stat na persona umola, che se dajea jù te sie lurier e si studies. Per 40 egn l’é stat secretèr de Comun e l’à abù te man duta la vita aministrativa de sie paìsc, luran trop sorafora l’orarie, con gran rigor ajache l cognea se cruzièr di scioldi de la jent, e autertanta capazità: per el legi e despojizions l’era l pan da ogne dì.

Canche l’é jit en penscion l’é stat nominà canzelist de l’E.C.A., lurier che l’à fat col medemo scrupol, ma che ge lascèa più temp per studièr, che l’era sia gran pascion.

L’à scrit per Nosha Jent e sun de autra publicazions rejonan de la storia de Moena cognosciuda travers i documenc del Comun, e de toponomastica: si studies sui inomes di lesc é stac publiché ence su Mondo Ladino del 1977.

Dò la publicazion del dizionèr de don Mazzel, a chel che l’aea colaborà, l’à metù ensema l vocabolèr del moenat, dat fora dal Grop Ladin de Moena del 1972 e restà l test fondamentèl de la  parlèda del paìsc. L’é se n jit, en ponta de pe, ai 25 de mèrz del 1984.

[Biografia touta fora dal Almanach 2020]