Ujöp Freinademetz (1852 – 1908)

Ujöp (per fascian Giosef) Freinademetz é nasciù a Oies, na frazion del paìsc de Badia, ai 5 de oril del 1852. L’à studià a Persenon, olache l’à fat ence l seminarie doventan preve del 1875. L’é stat capelan a Sèn Martin de Tor, olache l’era n muie benvolù, ma sia intenzion l’era chela de jir missionèr e donca l’é jit te l’orden di Verbic (Verbi Divini), del 1879 l’é partì per la Cina.

L’é stat a Shantung e con gaissa l’é stat bon de passèr via n muie de dificoltèdes e pericoi che vegnìa da na situazion politica de contra. Te chi tempes te la Cina l’era gran batalies anter riformisć e conservatores e n muie de cristiegn à paà con la vita sia testimonianza de fe. Ence Ujöp é stat torturà e perseghità e per pech no l’é mort. L’é semper jit inant te sia opera de evangelisazion e nience sia malatìa i lo à ferà te sia miscion.

L’é stat chiamà “l missionèr cineis” ajache l se à fat ite tant con la jent de la Cina da se sentir a la fin el enstes n cineis e voler restèr ló enscin a la fin. L’é mort ai 28 de jené del 1908.

Del 1975 l’é stat proclamà beat e ai 5 de otober del 2003 sènt, l prum e soul sènt ladin e te duta la Diozesa de Busan/Persenon. L vegn recordà ai 29 de jené.