Tita de Megna

L inom anagrafich de Tita de Megna, nasciù a Cianacei ai 21 de otober del 1884 e mort ai 6 de messèl del 1968, l é Giovanni Battista Gioacchino Maria Costa. De mestier l fèsc l calighé e canche l va en penscion l fèsc l monech.

Te na sia “Recordanza”, vegnuda fora su La Veisc del aost del 1968, vegn scrit de el che “l era bon de fèr el contadin, el pitor e, te un besegn, ence el murador” e amò apede “el parlèa el todesch franch”. Chest scrit e vèlch nota biografica s’i troa tel boletin del ICL Mondo Ladino, che tel nr 30/2006 à publicà l test ladin de la comedia “El moliné e sia fia”, traslatà dal todesch apontin da Tita de Megna. L é na persona de gejia, l é pascionà de erbes da medejina e l ge tegn n muie a la cultura e al lengaz ladin; l é un di prumes che scrif per l’Union di Ladins e gran pèrt de si materièl vegn publicà tel liber “Sposc e Maridoc”, che te la pruma edizion del 1965 l tol ite, apede a la descrizion di rituèi de noza te Fascia, ence desvaliva conties scrites da el.

Su la recordanza de La Veisc se lec amò: “el sentìa un gran amor a noscia parlèda de cèsa, a noscia usanzes da chi egn e a la bela conties che lo trasportèa col pensier e co la fantajia ai tempes de nesc antenac. Perché chest patrimonio no l vae perdù, el se à tout el desturbo de scriver dut chel che l saea [...] Tita l à lascià un patrimonio de cultura ladina che no l vegnarà più desmentià, e so inom restarà ence dò, canche nesciun sarà più chi che l’era”.