Teresa Pezzei

Teresa Pezzei la é nasciuda ai 28 de mèrz del 1954 a Col. Per egn l’à ensegnà te la scola populères de Fodom, timpruma a Rèba, olache l’à vivù con sia familia, e do la riunificazion di istituc la é jita a La Plì. L’à desmostrà gran profescionalità te sie lurier, ma amò de più na gran pascion per la conservazion e la promozion del lengaz e de la cultura ladina. Apontin te scola Teresa la se à dat ju per fèr crescer te la neva generazions na fona coscienza de partegnuda. L’à fat pèrt ence del prum consei scientifich del Istitut Ladin Cesa de Jan.

L’à endrezà desvaliva publicazions: da recordèr “Biotopi di Livinallongo”, ensema al ampezan Dino Dibona, e “Juosc e śogatoi da Fodom”, na enrescida sui jeghes fodomes da zacan. L’à ence lurà con l’Intendenza de la Scola ladines de Busan per l endrez del prum liber per l ensegnament del ladin te scola, “Laoron deberiada”. Desche assessora a la cultura del Comun de Fodom l’à metù su l concors per la mendranzes linguistiches de la Tèlia “Mendránze n poejia”, n projet che à abù ejit a livel nazional, che à tout ite partezipanc da duta la 12 mendranzes recognosciudes da la lege 482/99 e che anchecondì l é slarià fora ence foradecà, a la mendranza romancia te la Svizra.

La se à dat ju ence per l volontariat, en particolèr a cef de la Crousc Biencia de Fodom l’à lurà acioche vegne fat su la neva senta de la sociazion. Teresa Pezzei la é morta ai 24 de mèrz del 2010, ge lascian a sia jent segur n gran contribut.