Luigi Cincelli de Zul

Luigi Cincelli de Zul l é nasciù ai 20 de messèl del 1927 e do aer fat la scola populèra a Poza l é jit te seminarie de Trent. Arbandonà l troi religious, del 1951 l se à diplomà maester e l é jit a ensegnèr te la scola populères te Gherdena, te la Val Badia e te etres lesc del Sudtirol, de Fascia e del Trentin.

Del 1965 l se à laurèa en pedagogia a l’università de Pèdua e l à ensegnà te la scola mesènes de Moena e ju per Trent. L se à maridà con Emma Molteni e l à abù 2 fies, Chiara e Francesco. Vegnù de retorn te Fascia l à ensegnà a la Scola d’Èrt de Poza enscin canche del 1989 l é jit en penscion.

L à semper abù gran enteres per la mitologia ladina, pascion che é testimonièda ence dal inom che l ge à dat a sie alberch: del 1983 l à avert sa Meida “El Pilon”, che fèsc referiment a la fegura mitologica de la Roma veiora. Pean via da sia enrescides te chest ciamp, l à portà dant ence desvaliva publicazions, anter l’autres “Vich te le contìe de zacan – Vigo nelle leggende” e “La valle dei draghi”.

L maester de Zul l à abù contac con Karl Felix Wolff, coi fies de Hugo de Rossi e con pare Frumenzio Ghetta. Dal 1960 al 1974 l à publicà tropes articoi su La Veisc e sul boletin del Decanat de Fascia La Campana della Pieve. L à colaborà ence con la Rai Ladina de Busan per la trasmiscions Dai Creps dl Sela.

L é se n jit a l’età de beleche 93 egn, te sia majon, ai 22 de jugn del 2020.