Simonin Chiocchetti Maza

Simone Chiocchetti Maza nasc ai 20 de dezember del 1915 a Moena da Maria Damolin e Giacomo Chiocchetti Steto, genitores de fona reisc cristiènes, che ge ensegna serietà e empegn.

L studia e l doventa maester, l vegn manà a ensegnèr en Val Passiria e dapò a Soraga, Poza e Dèlba. 

Endèna la seconda vera l’é ofizial te la Dalmazia: chiò l cognosc l’oror de chela che l disc esser “l fal più burt che l’om podesse far, n gran faliment de la politica e de la diplomazia”.

Dò la vera l va a ensegnèr a Pressan de Lavis e dò a Moena, lascian na fona ritajon culturala te si studenc. Per duc a Moena sarà semper “l Maestro Maza”.

Del ’47 l se marida con Margherita Defrancesco e i à trei fies.

Da semper enteressà a la cultura e al lengaz ladin e vejin a l’Union di Ladins, del ’63 l met sù l Grop Ladin da Moena e l boletin “Nosha Jent”; l se dèsc jù per l ladin te scola, l’é un di prumes ensegnanc de ladin te tempes senestres e l tol pèrt a la batalies per l recognosciment di deric di ladins de Fascia.

L se dèsc jù per la comunanza e ence te l’aministrazion desche Conseier de Comun, palesan semper n aut sens zivich e sozièl e na gran atenzion per i più deboi. L’ejempie de coerenza e integrità e che l dèsc con sia vita l’é la lezion più bela per i joegn.

De dezember del 2005 l Maester Maza vegn festejà dal Grop da Moena e da l’Union di ladins per si 90 egn. L mor ai 6 de firé del 2006 e a diesc egn da sia mort ge vegn dedicà la sala grana de la Scoles de Moena.