Leo Soraruf de Koluzi nasc a Poza ai 29 de messèl del 1934 e jà da joen l va jun Busan - olache lurèa ence si père - a fèr la scola mesènes dai Franceschegn. L laora per 5 egn te na boteiga de colores, dò l ciapa l diplom de ragionier da privatist, l venc n concors e l va a lurèr ti ofizies contabilità de la Provinzia de Busan.

Pascionà de ladin, l tol contat con don Massimiliano Mazzel, che fajea trasmiscions a la radio de Busan e travers el l rua a fèr pèrt de l’Union di Ladins de Fascia, olache l met sobito a frut sia gran competenza su la leges de la Provinzies e de la Region e sul stravardament giuridich di ladins.

L vegn de spes te Fascia, l se dèsc jù per regoer la paroles ladines per l dizionèr de don Mazzel (l contestarà semper che chel vocabolar l’é de duta la jent de Fascia, no demò del Preve de l’Ors) e l scrif trop su La Veisc.

Al scomenz di egn ’70, con Remo Locatin, Danilo Dezulian e etres, l porta inant l besegn che l’Union no se cruzie demò de cultura, descheche volea don Mazzel, ma ence de politica. L’é i egn de la batalies per l Comprenjorie ladin, per aer na scola ladina e i medemi deric de Gherdena e Badia; i egn del “Los von Trient”.

Passé i tempes de la batalies, l resta atif te la Comunanza Ladina de Busan e del 2002 l ciapa l recognosciment da l’Union Generèla per so empegn per la cauja ladina.

Ai 13 de otober del 2012, a la prejentazion del liber su don Mazzel, l fèsc a Cianacei sie ùltim intervent empascionà. L mor jun Busan l meis dò, ai 16 de november.

almanach 2016