Salvester Erlacher

Salvester Erlacher, cognosciù da sia jent desche “Festl de Plaza”. nasc ai 31 de dezember (en Sèn Salvester) del 1910 a Frena, na vila sunsora La Pli de Mareo. Sie maester l’é Jepele Frontull e de gra a el Salvester va a studièr a Persenon. Dò la matura l fèsc l’Università a Dìspruch, l ciapa la laurea en storia e filosofìa e semper a Dìspruch l’ensegna te la Handelsakademie.

Endèna la seconda vera mondièla l fenesc te la Franzia e a Montecassino, e canche l vegn de retorn l taca a ensegnèr storia e filosofìa al liceo de Persenon.

Del 1953 l vegn nominà diretor de la scola mesènes de Ortijei, che resta sot sia direzion fin al 1974,  passan te chi egn da scola talièna a paritetica. Del 1954 l’envìa via ence l’Istitut Tecnich Comerzièl, semper a Ortijei, de chel che l doventa diretor enscin al 1979.

L porta inant l’encèria de diretor te duta doi la scoles, e apede chest no l se tira endò da n grum de empegnes, un de chisc tel setor de la cultura ladina. L’é l’ideator del sfoi “Nos Ladins” scrit te la desvaliva variantes de ladin: dal 1949 al 1972 l dèsc fora ben 507 numeres del sfoi.

Del 1954 l publica l liber “Storia dai Ladins dla Val Badia” e per si desvalives meric l vegn nominà component de onor de l’Union di Ladins e l ciapa l pest “Aisciöda ladina” da pèrt de l’Istitut cultural. L mor ai 4 de setember del 1991.