Emilio Chiocchetti

Emilio Chiocchetti nasc a Moena ai 17 de setember del 1880 da Lorenzo Chiocchetti Lenz e Maddalena Degiampietro e l vegn batejà con l’inom de Giuseppe. L va per ot egn a scola a Moena e dapò l taca e studièr privatamenter al Ginasie vidà da don Giosef Gilli.

Ai 10 de otober 1895 l met la viesta da frate tel Covent francescan de la Madona de l’Aiut, vejin a Arco, ciapan l’inom de Padre Emilio. L porta a compiment si studies tel Ginasie di Padri Francescegn de Rorèi e i studies teologics a Trent; ai 5 de messèl del 1903 l vegn ordenà preve.

Del 1905 l vegn manà a Roma per se spezialisèr en filosofìa e del 1907 l ciapa la laurea francescana. Ai 26 de mé 1908 ge vegn dat l tìtol de Letor General: l pel ensegnèr te duc i Istituc francescegn del mond. L va a studièr tel Belgio, te la Germania, a Viena e dò endò deretorn a Rorei.

Del 1913 l doventa diretor de la Rivista Tridentina e del 1914 diretor de la Congregazion Mariana major per i studenc de la Scola Mesènes de Trent.

Endèna la vera l’é Capelan de l’ospedèl militèr e ti egn de l’ejilie en Austria l porta didament ai interné.

Dò la vera l se mèla de encefalite letargica, na malatìa che no ge dèsc più paze. L va però inant amò a ensegnèr dut entorn, enscinamai a l’Università Catolica de Milan.

L mor a Moena ai 27 de messèl del 1951, te la “ciasa di preves” de Someda, olache l’é nasciù e da olache l’é vegnù fora ben 7 persones che se à spenù per la Gejia. Moena ge à dedicà la scola populères e la biblioteca de comun.