Renzo Chiocchetti Nacio (1945 - 2020)

Renzo Chiocchetti del Nacio nasc ai 17 de november del 1945 su la vila de Sort a Moena, un di 10 fies de la familia de Nacio del Cenchen. L cresc sù te la gran coa de atlec de la sozietà sportiva de Moena, la Monti Pallidi. Jà da bez e joenet l tol pèrt a garejèdes de livel nazionèl de paslonch venjan i campionac taliegn di studenc.

Sie alenament da student de la Scola d’Èrt de Sèn Jan, dal 1960 al 1964 l’é jir duc i dis da Sort de Moena enscin a Sèn Jan, d’invern coi schi i etres meisc con la roda o a pe. Del 1961 e del 1963 l venc l prestigious Trofeo Laurin su la neif de Poza.

Del 1965 l vegn tout sù dal Grop Sportif Fiamme Gialle de Pardac e dal medemo an fin del 1980 l fèsc pèrt de la Nazionèla maora talièna de paslonch, venjan 9 outes l titol talian te la desvaliva desciplines di 15 km, di 30 km, di 50 km e te la stafeta. Resserva ai Jeghes Olimpics de Grenoble del 1968, l gareja a la Olimpiades de Sapporo del 1972 e a Dispruch del 1976. L tol pèrt ence ai campionac mondièi de Falun te la Svezia del 1974. L se à dat jù te la gran garejèdes de paslonch, desche la Marcialonga, la Vasaloppet, la König Ludwig Lauf de Oberammergau e la Dolomitenlauf de Lienz.

Canche l lascia sù l mond de la garejèdes a livel mondièl l met sia esperienza te la sozietà Monti Pallidi desche president dal 1984 al 1989. Ence maester de schi alpin, con sia femena Giuliana dal 1973 l gestesc l’Hotel de familia sun Sort, l’Hotel Pedebosco fin del 2020, canche l mor ai 13 de firé.

[Biografia touta fora dal Almanach 2020]