Eleonora Riz de Janoto, na vita te anter sia comunanza

Eleonora Riz de Janoto rechies te sia stua.

Te na bela bonora da d’invern, con l soreie che ciutèa ite per fenestra de sia cèsa a Ciampedel, Eleonora Riz de Janoto. clas 1929, l’à tacà a ne contèr de sia vita passèda anter i joegn, la cèses da fech e la paladines di teatres.

Semper de bona luna e con l grignot sul mus e i eies piens de legreza, Eleonora i la cognosc duc e per duc a Ciampedel l’é n pont de referiment. La é stata te l’Azion Catolica e la ge à fat dotrina a duc i bec, l’à lurà a la Stella Montis e aló l’à vedù no se sà nience tenc de bec da duta la Region e amò l’à cognosciù duta chela femenes che chiò desche cheleres dò se à maridà te val.

Protagonista del teater de la filodramatica de Ciampedel e colona di Schuhplattler de Ciampedel, apede al bandierèl te ogne ocajion, con sie “cinquino” la é ruèda dut entorn a binèr ensema guanc per la comedia, comprèr seides e teiles per fazolec e gramièi. Descheche l’é stat, amò ades sie usc l’é avert per duc chi che à debesegn ence de n consei.

Eleonora, co ela stata che aede scomenzà a fèr teater?

“A fèr i prumes teatri l’era i Pascalins, Giochele Bastian Rich, Giovanni Peta e ence mie fra Angelo, del 1924. L’era demò omegn che podea fèr comedia e i les fajea cavìa, olache ades l’é la scolina. Enlouta aló l’era la mèlga. Dò aon scomenzà a fèr comedia con i bec de l’Azion Catolica e ence fajane cavìa e l’é stat da aló che pian pian i à tacà a tor ite ence femenes. La pruma che i aea fat l’era stat “I martiri del Giappone”, ma gé no aea podù, percheche mie père no me aea lascià, l’era ite massa “giovanotti” e a mie post l’é jit ite Erica Mazzel.

Che comedies!!! Peissete che te cèsa son stata gé a scomenzèr a ge dèr del “tu” ai mie, enveze che l “vo”; i mie no me à mai dit nia per chel, ma mie fra me dijea “no se ge dèsc del tu!”. La pruma comedia che aon fat nos femenes via la scolina l’é stat “Cuor di schiava”, é duta la fotografìes, siane gé, Olinda Riz, Rosalinda de Giacomino. Enlouta les era dutes per talian percheche l’era l’Università del Sacro Cuore che manèa sù i tesć, l’era dut con l’Azion Catolica. L’era don Giovanni enlouta, enveze canche l’é vegnù don Marino Cavada da Pardac l’à fat fora la scolina. Peissete che don Marino l’à sobito domanà na man a mi e Agnese de Śepele de Micel e l ne à metù aló a lurèr: ela vardèa via i bec e gé fajee la coga e el tolea amò na maestra. Dò l ne lascèa fèr ence comedia. L’era demò bezes e anter bezes se podea fèr.

Dapò aon scomenzà a fèr la “Contessa del Volmar” de jugn del 1967 con femenes e omegn. Siere gé, Mario de Rafaele, Tate, Rosalinda, Giacomino che i se à cognosciù aló e i se à maridà. Dapò l’era Mansueto, Gino Pezol, Ana de Tita Spangler. Se regolane piutost da soi, aane vèlch guant da chi egn, o se no me recorde che me l fajee enstessa. L’era roba de mia mère ence, e mie ciapìe, mia tasces. Aon fat dapò autra comedies de cheles che é duta la fotografìes: “I due sergenti” con Gino Pezol e Mario de Carlina; “La sghignazzata della colpa” del 1968 con Lino Davarda, Mario de Rafaele, Regina de la Cacciatora e sia sor Lucia, Carla Merichèna, Alma Davarda e amò “Mia moglie direttrice”.

Coluna él stat la più bela? L più bel recort?

“L’Ucel del marescial”, de chela fosc é i più bie recorc. Me recorde che fajee più sorì a fèr cheles da grignèr, ence se cogne dir che i grignèa ence se no fajee na pèrt da grignèr, gé no sé che fèr!”

Can aede scomenzà a fèr comedia per ladin?

“Con don Tito i à fat l teater e aon scomenzà ence per ladin, el ge tegnìa n muie e l ge vardèa ence fora ai tesć. L’é stat ence n trat de temp che Anelise comanèa dapò l’era Giuliana Minela che vegnìa a ne mocignèr sù l mus e Giovanni Spinel Zul ja Fontanac fajea la scenografìes. Ence gé me cruzièe de binèr ensema chel che servìa. Cotant che son jita stroz per la comedies... per “Papier veie” me é fat fèr l caret da Memo del Faure da Cianacei e che che no son jita a me chierir robes ja Pardac. Aee l “cinquino” e podee me mever.

Son stata la pruma a fèr la patente chiò a Ciampedel;  mie père l se enirèa ben se l me vedea passèr e n’outa l me à petà demez duc i libres, l li sconea. Ma bon bon... siere via a la scolina e se cognea jir a tor i bec. Cognea jir l preve a tor chi da Fontanac e gé te mi cef me é pissà “ma dai che fae patente!”. Canche i à fat la lezions siane de dotrei ence da Cianacei e da Dèlba. Jiane cavìa da la scoles per la teorìa. Siere ben brava de teorìa, ma de motores no siere proprio una de cheles che se n capìa fora, chisc omegn fajea auter più sorì. Ge enteressèa de più ence percheche gran pèrt i durèa la machina per lurèr. Gé enveze l’era per jir a portèr i bec... N’outa con Celso Pezol sion jic con l’auto de don Tito l me à lascià vidèr fin a Fontanac, ma percheche jìe mìngol massa a dreta l me aea dit “Te pree, no jir a mures!”. Me la recorde semper. Dò, canche siere jà a la Stella Montis, Angelo mie fra l se à comprà na Bianchina e mia mère l’aea dit “ence per te Eleonora” e canche ge la domanèe, te sès ben coche la é... “Anché la doure ié!”. L’é coscita. Fin canche me é comprà l cinquino, son jita dò e dò con chel. Son jita finamai a cherosene n’outa... ma che teater!”.

Co éla stata che siede jita a la Stella Montis?

“Canche é scomenzà via la scolina aee duc i bec del paìsc e duc me à volù ben, duc i se recorda de me e cogne dir che siere mìngol un “capitano”, ge cridèe ben ence e me é cridà ence con don Marino, con don Giovanni, con don Silvio e gé ge é tegnù dur.

La scolina la era averta demò d’invern e don Marino endèna la festes da Nadèl l ge la fitèa ai bec de l’Azion Catolica de Busan e canche i me à vedù cavìa chisc joegn i à vardà de me portèr via a la Stella Montis che aló n’era 120. Ades i l’à venù al Croce, ma l’era de l’Azion Catolica. Via a la Stella Montis l’era duc i joegn de Busan e n muie de bezes che vegnìa a lurèr e che à troà ence da se maridèr chiò. Ence gé é cognosciù mie om Pietro Canzi, che l’era del 1911. L’era mie jorman e l’era da Milan e l vegnìa d’istà e canche l’é stat en penscion l’é vegnù a lurèr a la Stella Montis, i me aea dat n aiut te cojina de aost. Sia femena la era morta, jà dant se cordane, ma dò amò de più. Canche fajee comedia l dijea “no vegne jù che la me les fès chiò duta la comedies”. Gé te die che na beleza l’é stat!

L meis che aee più da fèr l’era messèl, l’era duta la GS (Gioventù Studentesca) de Milan, ma l’era n bel... e tanta de outes l’era don Giussani che l vegnìa ite te cèsa da fech e l me dijea “Eleonora vieni fuori che non siamo capaci di farli stare zitti!” e gé de fèr ac siere bona. Gran pèrt se fajea pasta asciutta, l’era de gran fanes, ma maladeta de trent’egn aee na forza. É abù via tanta de chesta bezes da Ciampedel a didèr e dapò ence da Busan i portèa sù chela studentes che no capìa nia e cognee ge n dir ence aló. Comanèe dut, fora che te segreterìa. Comanèe ence la roba, son stata via 15 egn e da sera jane amò a teater.

Fajane de dut, n’outa me é brontolà ence con la monies ja Sèn Jan. Te conte! Enlouta se fajea dotrina, ai gregn se fajea te gejia e ai bec se jìa via la scoles. Gigio Bais ge fajea ai gregn e gé ai pìcoi. La monies ja Sèn Jan les aea chel mìngol de teater e na domenia che l’era dotrina les aea metù dant l spetacol. Don Marino enlouta l’aea dit che cognee fèr dotrina dant e canche é fenì son jita jù con la braes e la roda, chel’autres les era jà ju con la coriera. Vae jù e “No, non puoi entrare con i pantaloni!”.

Ma dai!?

“Gé siere ben n pìcol diaolet e jon jita su te chela loggia che l’era, ma l’é vegnù sù ence la monia e la me à parà. Son vegnuda su e da enlouta no les é mai più podudes aer. A jir con la roda te capesces ben che l’era più sorì con la braes. L’era Rudy Gross de Poza che l me les fajea”.

E del guant Eleonora? Sé che i vegn duc a se regolèr chiò...

“La bezes les vegn percheche gé é tegnù sù. No che gé fae camejoc, ma son semper jita col camejot; da beza no tant, ma dò che son vegnuda ca da la Stella Montis é tacà coi Schuhplattler che dant ence ic ence no i n’aea ite femenes. No siere bona de balèr, ma siere de compagnìa e i me à volù ben ence chi e amò i me disc de jir. Acà doi egn son jita con Pietro cassù (Riz), con mie bachet... a temp de musega dut va!

Viapura te die sobito, camejoc n’é percheche te cèsa de mia mère l’era cater sores. La mère de mia mère la é restèda vedova e l’aea cater fies. Les aessa abù ence n fra, ma chel l’é mort da pìcol e donca l’era cater touses e enlouta dutes aea l camejot e chesta trei touses les se à maridà dutes ju per Busan olache les aea cognù jia en servizio. Les ge à lascià dut a mia mère e per chel ades i é gé. I é veies chisc, ma i é amò. Dapò no posse ge emprestèr a chela granes, percheche mia amedes les era ben mìngol più granes che gé, ma no tant de più.

Canche aee l cinquino jìe daperdut, saee dut... chel che no é comprà sù de gramièi! No n’é mai fat camejoc, demò gramièi fae gé, ma che che no son jita da Eccel jun Busan che l’aea rodolons de teiles, aee n da fèr... Ence chi pìcoi guanc i é fac fèr e dapò é dò e dò emprestà, gé e Lis. Son jita con chesta bezes en cà e en là.

É abù na bela vita, é de bie recorc. Ades no son più bona de corer e jir stroz, ma jisse amò. Ence a mèscra, tant che me é godù e tantes che n’é regolà. Aee tacà con Paul Riz la pruma outes e sion jic per egn. Se aane regolà con guanc veies e se aane metù inom Bertol e Maruièna, dò aon fat ogne an, se enventane zeche. Aon fat la Nozes de or, Megna da ren, n’aon fat sù teis mèscra, l’era ence don Tito che ge tegnìa. Che teater! É de bie recorc, percheche duc me à volù ben”.

Valentina Redolfi, La Usc di Ladins 11 del 2015