Pasqual Crazzolara (1884-1976)

Pasqual Crazzolara é nasciù ai 12 de oril del 1884 sul Lüch da Pecëi a San Ciascian, te la Val Badia. De 12 egn l’é jit a studièr a Persenon al Vinzentinum e dapò, ajache l volea jir en miscion, del 1900 l’é jit dai Comboniani a Milland.

L’à fat i studies teologics, de aost del 1902 l’à dat i voti religiousc e ai 29 de jugn del 1907 l’é stat consacrà preve. L’an dò l’é stat manà a Khartoum, te l’Africa, olache l’à emparà l’arab e del 1910 l’é jit te l’Uganda. L sostegnìa con forza l’idea che no se posse ge ensegnèr la religion a etres popoi zenza cognoscer sia cultura e l se à sobito tout fora de anter per sia gran capazità de emparèr i lengac africhegn.

Ti desvalives vilajes l chierìa de rejonèr semper desche la jent del post, enjignan ence tesć de religion e catechism tel lengaz local. Ruà tel Sudan, endèna la pruma gran vera l’é sciampà te l’Egit e l’é stat fat prejonier. Del 1920 l’é endò jit tel Sudan e del 1931 l’é stat envià a Viena e Londra per portèr inant studies linguistics.

Del 1933 l’é jit endò te l’Uganda, l’à metù ensema libres de scola, vocabolères e gramatiches ti lengac de desvaliva popolazions de l’Africa, lascian studies preziousc no demò de carater linguistich ma ence storich e etnografich. Del 1963 l’à ciapà l recognosciment M.B.E. da la regina Elisabetta, del ’65 l’é doventà member de onor de la Royal  African Society e dapò Comendator de la Republica talièna, ma l’é restà semper n om umol.

L’é mort a San Ciascian ai 25 de mèrz del 1976, de beleche 92 egn.

[Biografia touta fora dal Almanach 2020]