Bepe Richebuono (1923-2020)

Bepe Richebuono l’é nasciù a Genova ai 25 de oril del 1923 da na familia con reìjes tel Ciador, l’à studià da preve anter sia zità de naa e Persenon e l’é ruà te Ampez del 1948 a far l capelan enscin del 1952 canche piovan l’era Piere Freinademetz.

Del 1959 rua sia laurea en letres modernes a l’Università Catolica de Milan con na tesi sun la storia medieval del Ciador e te Ampez, che vegn publicà con l’inom »Ampezzo di Cadore dal 1156 al 1335«.

Dal 1957 al 1962 l’é ensegnant de talian tel Vinzentinum de Persenon canche l lascia l servije da preve e l se marida e l’à trei fies.

L’à ensegnà tel cianton de Sèn Gal te la Svizra, a Maran e a Busan enscin canche l’é jit en pescion del 1988. L professor Bepe Richebuono l’é stat un di maores studiousc de la storia di Ladins de la Dolomites. L’à scrit l liber »La storia de Ampezo« del 1974, »Pitla storia di Ladins dla Dolomites« stampèda più outes per talian, todesch e te più idiomes ladins da pèrt di Istituc culturèi ladins.

L’à rejonà a la RAI Ladina de Busan e ensegnà storia e rejonèda di Ladins a l’Università de Dispruch. Del 2002 l’à ciapà l recognosciment da l’Union Generela di Ladins dla Dolomites e del 2009 l »Ciampanin« de Cortina. Sentadin de onor del Comun de Ampez dal 2010, a Dispruch ai 15 de aost del 2013 l’à peà la Crousc del Tirol e n’autra onorefizenza dal Comun de Busan del 2018.

L’é mort de 97 egn ai 26 de setember del 2020 jun Busan, sie ultim dejiderie l’é stat de vegnir sepolì te Ampez. 

[Biografia touta fora dal Almanach 2020]