Maria Piaz, Mère del Pordoi (1877 – 1971)

Maria Piaz nasc a Pera ai 25.04.1877. De 12 egn la lascia la scola populèra e de 13 la pea via per jir jun Busan: la vel jir a emparèr a leèr ite libres, ajache ge sà tant bel lejer.

Do esser stata n an sot patron te n mèsc sora Busan, la vegn domanèda desche mascèra dal Hotel Rizzi, olache la cognosc Cristoforo Dezulian, n garber da Pardac che la maridarà de 19 egn, canche el n à 40.

L é i prumes egn del turism te Fascia, se taca a rejonèr de fèr su refuges te la Dolomites e Maria, femena de spirit ledech e determinà, passan na dì sun Pordoi la se enamora de chel post e la compra n bait de legn colassù.

Taca coscì sia vita da imprenditora del turism sun chel jouf, che te 60 egn ge farà vadagnèr l inom de “mère del Pordoi”. Anterite l é fac ries, desche endèna la Gran Vera, canche la rua te ciamp de conzentrament a Katzenau per aer didà doi sudé a sciampèr (e su chest fat storich l Istitut Cultural Ladin Majon di Fascegn à dat fora na bela publicazion rencurèda da Luciana Palla dal titol “Dal Pordoi a Katzenau”).

La festejea i 88 egn con na raida con l elicoter sora la Dolomites e del 1966 ge vegn dat l orden di Cavalieres del Lurier. La mor ai 29 de jugn del 1971.

[Biografia touta fora dal Almanach 2013]