Luis Trenker

Luis Trenker l é nasciù a Ortijei ai 4 de otober del 1892, sie père l vegnia dal Tirol e l depenjea statues per la gejies, sia mère la era da Ortijei e l é stat ela a ge passèr l amor per l ambient e per sia val, a chela che l é stat semper n muie leà, tant esser un di fondadores de l’Union di Ladins de Gherdëina.

Do aer fat l Ginasie jun Busan e fora Dìspruch, l se à scrit ite al Politecnich de Unejia e do a chel de Graz olache l é doventà architet. De gra a sia pascion per la crepes l é doventà menacrep e endèna la pruma vera mondièla l é stat ofizial austroungarich sul front de la Dolomites.

N muie bon de jir coi schi e a crepes, jà ti prumes egn ’20 l à tout pèrt a desvalives film desche ator e col temp l é doventà ence regist e produtor de film. Del 1931 l à fat so prum film da regist, “Berge in Flammen”, tout da n roman scrit da el enstes.

Ti egn sia cariera de ator se à smaorà e l é ruà enscin a Hollywood e ence a Cinecittà; del 1936 sie film “Der Kaiser von Kalifornien” l é stat premià a Unejia desche mior film forest.

Sia pascion, sia forza e si ardiment l à spent a lurèr fin inant con l’età: sia produzion é dassen n muie grana e ensema a Giorgio Moroder, l é un di ladins più cognosciui fora per l mond. L é mort del 1990 jun Busan de 97 egn.