Ilda Pizzinini
La nasc a Badia ai 26 de aost del 1934. Do aer fat la populèra te sie paisc la va a Maran a fèr la magistrala e la doventa maestra dant a San Ciascian e do a Sen Linert.
L lengaz ladin, sia cultura e sia storia, i é semper tedant te ogne sia cernuda e la se dèsc ju de chest vers te ogne ciamp de sia vita, dal lurier a la vita privata.
La ensegna ladin e la doventa vizepresidenta de l’Uniun Maestri Ladins; tel ciamp del turism, ajache la é ence patrona del Hotel La Stüa a San Ciascian, la vegn metuda a cef de l’Union dai Ostis dal post, olache la porta inant na promozion turistica leèda a la cultura: tras relazions publiches su storia, lengaz e cultura ladina la fèsc nascer ence ti ghesć respet e conscidrazion ti confronc de la mendranza ladina, renforzan coscita ence l’identità de la jent del post.
La tol su la presidenza de l’Union di Ladins de la Val Badia e la met su l Grop bal popolar. Del 1986 la doventa presidenta de l’Union Generela di Ladins dla Dolomites, encèria che la tegn enscin al 2003, restan fin a sia mort presidenta de onor: sie obietif l é semper tegnir adum duc i ladins del Sela.
Ilda Pizzinini mor tel ospedèl de Bornech ai 17 de messèl del 2015: l é l’ultima gran personalità carismatica anter i idealisć e ativisć ladins te la unions, la istituzions e la politica.