Egidio Dantone del Pich

Egidio Dantone, cognosciù desche Sgrafic, l era n artist da Gries nasciù al prum de jugn del 1942 e fi de Filomena Faber e de Tita Battista. L depenjea chèdres e l fajea scrites e decorazions su cèses e hotie duran la tecnica di sgrafic, da chiò sie curious sorainom. Chesta tecnica de decorazion a fresch cognosciuda te la Svizra, soraldut te la tera ladina de l’Engiadina, pel esser fata su mur o su ceramica: timpruma ge vegn dat ju na man de color e, do aer dessegnà e aer sgrafà via i toc che no se vel, resta na decorazion en relief.

Do aer fenì la populères Egidio l é jit te seminarie a Trent, olache l à studià per doventèr preve, ruan enscin a la vestizion. No l à mai fenì chest percors ma l é restà te zità e l é jit a lurèr per na firma de dessegnes e scrites. Entorn i prumes egn Sessanta l se à cruzià de decorèr la Cèsa Melester de Cianacei.

Egidio l à vent ence l concors per enjignèr l simbol de la SITC de Cianacei, che amò anchecondì l é en doura.

Sia èrt é ruèda te desvalives lesc de noscia val e te dut l raion dolomitan: l à lurà a Sèn Martin de Castrozza per na contessa, a Corvara per fèr l Albergo Col Alto e a Calfosch per dessegnèr i ores de la fenestres de n muie de cèses. Ta Cianacei l à decorà la cèses La Vivènes, Cèsa Col de Toi e Cèsa Paradis.

L é mort te n azident con l auto de jugn del 1975 endèna che l jia te Ciamp Trujan de demò 33 egn.