Lidia Schmalzl Fosco

Lidia Schmalzl é nasciuda ai 14 de aost del 1914 sun Ronc a Ortijei. L’à fat la chelera ti restoranc de Gherdena e ence te n Gasthof de familia sun Ronc. Al Refuge Passo Sella l’à cognosciù l cogo Luigi Gigio Fosco de Janmarìa, che dapò l é doventà sie om.

Ruèda te Fascia do se aer maridà del 1940 l’à scomenzà a jir con la vaces sa Pecol olache, mingol a l’outa e te n lech amò pech cognosciù, l’à endrezà n picol imper turistich con chel che va inant amò la familia.

Te chi egn se à scomenzà a fèr su i prumes impianc portamont: con Gigio la se à comprà ite doi tiejes e n pra, olache del 1962 l é stat fat su l Hotel Bellavista.
Lidia à lurà duta sia vita sun Pecol, fin entorn i 75 egn: la jia su ogne dadoman a fèr i douces del alberch, la didèa dal mesdì e via per l domesdì la vegnìa de retorn a Gries olache l’aea sia cèsa.

Femena doucia ma ence forta e de spirit gaert, con anteveder, maniera, educazion e soraldut con gran lurier, Lidia l é stat una de la gran pionieres fascènes del turism e testamonech de n secol de storia de gregn mudamenc per noscia val, zenza ampò mai desmentièr i valores emportanc de la cultura da mont e del sentiment de familia.

La é se n jita ai 4 de messèl del 2017 a la bela età de 102 egn, con l pensier de “aer enjignà zeche con chel che mia jent posse jir weiter!”.